كود كازا ////

مرة اخرى بيان وزارة الخارجية ديالنا او بيان ناصر بوريطة مختالف على بيان وزارة الخارجية التركية. البارح دار اجتماع بين تشاووش اوغلو ديال الترك مع ناصر بوريطة بالفيزيوكونفيروس.

الخارجية المغربية قالت باللي اوغلو نوه على “بالدور الريادي لصاحب الجلالة الملك محمد السادس وبدور المغرب كقطب للاستقرار والتنمية في المنطقة”. هاد الهدرة ما جاتش فبيان الخارجية التركية كيف نشراتو فموقعهم النسخة العربية.

وزارة بوريطة قالت باللي هدرو على العلاقات الثنائية و”ضرورة إعادة تفعيل آليات الشراكة عبر تنظيم جلسات جديدة للحوار السياسي و عقد اجتماع اللجنة المشتركة” و”إرساء خارطة طريق للنهوض بالاستثمارات عبر الاستفادة من سلاسل القيمة الجديدة” واعلنا عن “تنظيم منتدى اقتصادي يتمحور أساسا حول التجارة والاستثمار، وذلك على هامش الاجتماع المقبل للجنة المشتركة”.

وقررو “تبادل الاعتراف بشهادات التلقيح التي تصدرها سلطات البلدين”.

وزارة خارجية تركيا نقلت تصريح لاوغلو فيه “سنقوم بتنشيط المشاورات السياسية، وسنزيد التعاون في القضايا الإقليمية والدولية، وسنعقد اجتماع اللجنة الاقتصادية المشتركة ومنتدى الأعمال هذا العام، وأنه تم التوصل إلى توافق بين البلدين بشأن الاعتراف المتبادل بشهادات لقاح كوفيد-19”. ما زادو حتى كلمة.

بيان مقتضب وبزاف.

دابا علاش بوريطة كيكتب بيانات طوال وفيهم مضامين ما كايناش فبيانات الوزراء اللي تلاقى معاهم. طبعا ما غاديش يكون كذب او خلق شي حاجة جديدة. غير كاينة امور فالديبلوماسية كيفضلو شي وحدين ما تخرجش.