محمود الركيبي -كود- العيون //

لجنة الاعتمادات المالية ف الكونگرس الأمريكي خرجات مشروع السنة المالية لـ 2022، وف هاد المشروع كاينة فقرة، ف الصفحة 201 من الرابط اسفله، كتنص على منع وزارة الخارجية الأمريكية من استعمال أي مخصصات ولا فلوس لبناء وتشغيل أي قنصلية ف الصحراء.

ولكن هاد الوثيقة ماشي نهائية، ومقتصرة غير على هاد الغرفة، دابا خاصها الموافقة ديال مجلس النواب، وهادشي غادي يكون خلال انعقاد اجتماع بين المجلسين ف دجنبر باش يخرجو نسخة موحدة.

رئيس لجنة الاعتمادات المالية ف مجلس الشيوخ، باتريك ليهي، معروف انه من المؤيدين ديال البوليساريو، وكان واحد من الموقعين على رسالة صيفطوها أعضاء من مجلس الشيوخ هاد الايام، لإدارة جو بايدن باش يسحب الاعتراف الأمريكي بمغربية الصحراء.

يذكر بأن وزارة الخارجية الأمريكية وافقت نهاية العام اللي فات على عملية فتح قنصلية افتراضية ف الصحراء، وهادشي بعدما اعترفت إدارة الرئيس المنتهية ولايته دونالد ترامب بسيادة المغرب على كامل ترابه الوطني.

https://www.appropriations.senate.gov/download/sfopsfy2022_final