نجوى المالحي-كود//

المغني حاتم عمور سخونة فيه البيضة كثر من القياس، ورجع الماتش لي غادي يجمع بين المغرب والجزائر فربع نهائي كأس العرب فقطر، بمثابة حرب بين البلدان.

السيد كان ضاربها بأحسن نعسة من نهار بدا كأس العرب، وملي تأهل المنتخب للربع النهائي ناض يهلل وعاود طلق واحد الأغنية ديالو، حيت بغى زعما يروج لراسو ولكن صدق معورها.

حاتم عمور كتب ف ستوري عبر حسابو الرسمي على “انستگرام”: “بإذن الله مغنخسروش الحرب، تاريخ جديد غادي يتكتب، لأننا منتخب كبير ومدرب كبير.. احساسي عمرو يخيب، حيت عندنا الرجاااال”.

كيبان ان عمور عندو التشجيع زايد نغزة على القياس، وهاد الكلام لي كتب خلا الناس ينتاقدوه، حيت المسؤولين الكبار في البلاد كيتفاداو يهضرو في هادشي.