سهام البارودي كود ///

مات جوني هاليداي ! الروك سطار الفرنسي لي متع أجيال ديال الفرنسيين و المغاربة بأغاني غاتبقا من الخالدات عند بزاف ديال الناس من جيل الستينات و السبعينات، مات و خبر موتو شقلب فرانسا كاملة ! ماكاينش الجريدة لي ماهضراتش عليه ! ماكاينش نشرة الأخبار لي مادوزاتش روبورطاجات عليه و على حياتو و على مسارو الفني ! ثلت أيام هادي و الروبورطاجات خدامين و البرامج و المعلقين و الفنانة و ليفان كلشي كايبكي على موت جوني هاليداي لي بزاف ديال الناس شافو فيها نهاية حقبة من الفن الفرنسي لي تعرف بفنانة كبار فحال جاك بريل و ايديث بياف …
أنا الصراحة ماشي فان ديال هاليداي وكأي مواطنة من دول العالم “النمي ” لي عندها عرام ديال المشاكل الخبزو-خرزية من الأولويات، لقيت راسي كانگول واه زادو فيه هاد الفرنسيين لي محيحين علينا بموت جوني موت جوني فحالا جوني عندو خمسطاشرعام ! صافي السيد عندو خمسة و سبعين عام قطع الورقة ! الله يعاونو !لاش غاتبكيو عليه لاش؟
ولكن دابا وانا كانتفرج فالنقل المباشر ديال الگنازة ديالو تعجبت الصراحة و بزز مني حسيت بداك التيو لوراني ديال الانسانية لي عندي مصدي مزياااان تبرونشا و خدم ! وا شحال ديال الحب كايحسو بيه هاد الناس اتجاه الفنان ! وا شحال ديال التقدير و شحال ديال الاحترام وا شحال ديال لاموغ ! الناس كاتبكي نيت آ بعيرير ! ناس مقصحة بصح حيت مات جوني ! وحدة كايسولوها الصحافة منين جيتي ؟قالت ليهم من مدينة بعيدة ! دوزات ليلة كاملة فالتران هي و راجلها، جاو يعزيو فجوني حيت نهار تلاقاو فواحد البلاصة كانت الأغنية لي خدامة ديك الساعة ديال جوني ! و نهار عرسهم شطحو على أغنية ديال جوني ! و جوني كان حاضر معاهم بأغانيه فبزاف ديال المحطات الطرقية ديال حياتهم و على هادشي مستحيل مايحضروش لگنازتو ! و يلبسو عليه الكحل ! و يحطو ليه وردة ! و يحزنو عليه !
موكب كبير ديال البايكرز ( حيت المرحوم كان عزيز عليه المواطر و عندو نادي ديال المواطرية) تاهوما تابعين الگنازة فواحد المشهد مهيب ! غادين مع النعش ديال جوني وسط باريس باش يوصلوه للكنيسة ! و البوليس و الرئيس ديال فرانسا و مرتو و لي فان و المغنيين و الممثلين من العالم كامل جايين يعزيو فجوني و يواسيو عائلة جوني ! هازين الورد و اللافتات و كاتبين فيهم :
Johnny tu vas nous manquer
Johnny on t’aime
Merci Johnny !
Rest in peace !
غانتوحشوك آ جوني
كانبغيك آ جوني
شكرا بزاف آ جوني
ارتاح آ جوني !
الناس عندهم فيض ديال الحب و المشاعر الصادقة ! بنادم زوين يا صاحبي ! بنادم رطب ! بنادم نقي !

شوف حنا ! فاش كاتموت لينا شي شيخة و لا شي مغنية ! شوف الكومونطيرات فالفايسبوك و اليوتوب ديال “بنو بوزبال” مساخيط الله في أرضه ! الفيروسات أعداء الفن و الحب! ماكاين غير “لا تترحمو عليها فقد ماتت فاسقة فاجرة ” الله يرحمها ليها لادارت علاش ترحم” آش دارت يا بوخنونة آش دارت؟ تا الرحمة ولات “كونديسيوني” ! وا قبل ماتموت كاتلقاهم موجدين ليها، مقوسين عليها ” آو ! عندها ستين عام و مازال ماهداهاش الله” ! ” آو بقا ليها غا شوية على القبر و تاهي مازالة شادة الميكرو “، ” وا سيري تحجي آش عندك ماديري بشي غنا”…

صعيب دير فحال هاد المقارنات بين الشوفة لي كايشوفو بيها الناس الفن و الفنانة لهيه و الشوفة لي كايشوفو بيها الناس الفن و الفنانة هنا !صعيب لدرجة المقارنة كاتبان ماعندها تا معنى! و لكن الصراحة حتى الفنانة لي كايعتابرو الفن حرام و عيب و ” الله يعفو علينا منو” سر مهم يعيشو مع شعب سكيزوفريني نهار يموتو يشمت فيهم و يكتب كومونطيرات تحت من فيدواتهم فاليوتوب من قبيل ” لاش كاترحمو عليه كان كايطحن الدوليبران