عفراء علوي محمدي- كود//
كيستعدو المغاربة اللي حاصلين ففرانسا للاعتصام والإضراب على الطعام لمدة 24 ساعة، الخميس جاي 11 يونيو، بسبب “عدم اهتمام الحكومة بملفهم وتركهم عرضة للمجهول” واستعمالها ل”سياسة الآدان الصماء”.
واستنكرو المغاربة اللي حاصلين ففرانسا، فبلاغ ليهم حصلات “كود” عليه، ترك الحكومة ليهم لأزيد من 3 أشهر، بلا مواكبة مادية أو معنوية، وهذشي خلاهم يفقدو الثقة فوعودها، خصوصا وأنها ماحددات حتى شي سقف زمني لرجوعهم للبلاد.
وتكلمو العالقين على ظروفهم المأساوية وكيفاش كيعيشو التشرد، بينما ماتو منهم مغربية فمليلة مغربي آخر بدولة الفلبین ومواطنة عالقة ببريطانيا وآخر بالسنغال وعالقان بالجزائر، وهذشي حسبهم كيترجم استخفاف الحكومة المغربية بيهم، وحملو المسؤولية كاملة للحكومة.
واستغربو العالقين إدخال الشركات الفرنسية مواطنيها للمغرب وتركهم هوما، وهذشي اعتبروه “كيتناقض مع التصريحات السابقة اللي عطات الحكومة، واللي فضلات المغرب على الاقتصاد”.
واعتبرو ارجاع 300 عالق فالأسبوع تباطؤ كبير “حیث إن العالم سیعرف ربما وصول بعض البعثات إلى القمر أو المریخ وفوج العالقین الأخير سیكون لازال مرمیا خارج وطنه، واخا سعة المغرب السريرية فالفنادق كتفوق 350 ألف سرير، ومجموع العالقين برا هو 32 الف عالق”، على حد تعبيرهم.
وإلى ماتجاوباتش الحكومة معاهم فأقرب أجل، كيهددو العالقين باش يديرو اعتصامات أمام السفارات فمجموعة من بلدان العالم.