سعيد الحسوني – كود //
عوتاني أطلق نظام الإنذار الأوروبي “RASFF” تحذيرا جديدا بتاريخ الجمعة الفايت بوجود فيروس الالتهاب الكبدي A في شحنة ديال الفريز جاية من المغرب.
هاد التحذير الجديد عجب الفلاحا السبنيول اللي زادوا حيحوا فالإعلام ديالهم يعاودون التأكيد على صحة موقفهم حين هاجموا الفريز المغربي ومنتجات فلاحية أخرى.
وكانت وزارة الفلاحة والصيد البحري والتنمية القروية والمياه والغابات المغربية، مباشرة بعد صدور تقرير “أونسا” حول سلامة الفريز المعني بالأمر من المرض، قد نفت بشكل قاطع كّاع الأخبار التي كتروج لإصابة شحنة فراولة مغربية مصدرة إلى أوروبا بفيروس الالتهاب الكبدي.
وقالت الوزارة أن هاد الشائعات المتداولة “خاطئة لا أساس لها من الصحة، وصادرة عن جهات تستهدف تشويه سمعة المنتوج الفلاحي المغربي”. واخا زعما هاد الجهات هو هيئة أوروبية متخصصة تابعة للاتحاد الأوروبي.
وا دابا آش جا ما يسكت الفلاحا السبنيول اللي على سبّة ومكيحملوش شي حاجة سميتها المنتجات الفلاحية المغربية وكيقلبوا غير على شي سبة يغرقوليها الشقف.
بالفعل ناضت منظمة La Unió اللي هي بمثابة فدرالية الجمعيات الزراعية الإسبانية تيرات فالفريز المغربي، وقالت هاد التحذير الأوروبي الثاني زاد كيأكد باللي الفريز اللي جاي من المغرب مريض والحالة الأولى اللي تكتاشفات هاذي 10 ايام ماكانتش صدفة.
لكن اللي ماعارفينش الأغلبية ديال الناس هو أن هاد نظام التحذيرات الأوروبي RASFF راه ديجا أطلق الآلاف من التحذيرات على منتجات زراعية من داخل الاتحاد الأوروبي ومن خارجه، والمغرب كاع ما كاين بين عشرة ديال الدول الأولى اللي جايا ضدها التحذيرات، المغرب يالله عندو 48 تحذير واسبانيا براسها اللي كتشكي عندها 130 تحذير.
ومصادر “كود” قالت انه هاد النوع من لاليرت عادي، وباللي كاين دابا اليرت على الخيار ففرانسا على قبال المبيدات.
واضاف نفس المصدر ان اسبانيا عندها على الاقل جوج اليرت فالنهار من دول اوربية.
