كود كازا ///

توصلو فرق الرجاء الرياضي والوداد والراك بمراسلة من الجامعة الملكية المغربية لكرة القدم كتقول ليهم سيرو قلبو على تيران فين تلعبو، الماتشات ديالكم حتى أكتوبر، لأن ملعب مركب محمد الخامس غادي اسدوه من 18 فش الشهر الحالي حتى 7 أكتوبر نهار لماتش لي غادي اجمع بين المنتخب المغربي والغابوني، برسم الجولة الخامسة من التصفيات المؤهلة لكأس العالم 2018 بروسيا.

وغادي العبو الرجاء ماتش واحد فدونور، والوداد كذلك ماتش واحد، قبل ميقلبو ليهم على ملعب باش العبوا الماتشاش لبباقين حتى ادوز الماتش ديال المغرب مع الغابون في أكتوبر.

وغادي القاو الوداد والرجاء ومعاهم حتى الراك مشكل باش القاو ملاعب فين العبوا خصوصا أن ملعب الراك مسدود، وملعب مولاي رشيد ممنوع العبوا فيه، وغادي اضطروا العبو خارج كازا، إما مراكش أو أكادير.

وباقي الوداد معرفوش واش الماتش ديالهم مع ضن داونز من جنوب إفريقيا واش غادي اتلعب في دونور ولا خصهم اقلبوا على تيران فين العبوا.

الرجاء والوداد عناو بزاف في الموسم الماضي ولعبوا بزاف خارج كازا ومن تحل دونور لعبوا غير ماتشات قلال، وهاد العام طامعين اديرو مداخيل مهم مني رجعوا العبو فتيرانهم.