مصطفى الشاذلي – كود سبور//

فاجأ الحسين عموتة، مدرب المنتخب المحلي، المتتبعين الرياضيين، فاش اعتبر تصريحات الناخب الوطني وحيد خاليلوزيتش إيجابية ليه وللاعبين ديالو، عكس ما اعتقده البعض.

وأكد عموتة في الندوة الصحافية البارح الأربعاء أن تصريحات البوسني وحيد ماغاديش تأثر على المجموعة “تلاقيت خاليلوزيتش مرة واحدة وتكلم فيها مزيان على اللعابة، لي كايمارسوا في البطولة، وهادشي غادي يخلي اللعابة يزيدو يخدموا مزيان باش يلتحقوا بالمنتخب الأول”.

عموتة قال ان هاد التصريحات “خديتها من الجانب الإيجابي وليس السلبي، لأنها غادي تكون حافز كبير لينا لماتش ديال الجزائر نهار السبت جاي بالملعب البلدي ببركان برسم الإقصائيات المؤهلة إلى نهائيات كأس إفريقيا للمحليين”.

عموتة أكد بلي تصريحات خاليلوزيتش ما غاديش تأثر على اللعابة وغايركزوا مزيان باش يربحوا “كلامه لم ولن يؤثر في اللاعبين و ءطقم المنتخب المحلي، و المجموعة تركز حاليا بشكل مضاعف من أجل تحقيق نتيجة إيجابية أمام الجزائر”.

وسبق للمنتخب المحلي أن تعادل بصفر لمثله أمام الجزائر في ملعب تشاكر في البلدية في الماتش ديال الذهاب.