كود هناء ابو علي ///

الصحافي المهني عمر الراضي خرج رابح من قضيتو ضد مصور صحافي من “شوف تيفي”. واخا يتشد فالحبس ويتحكم عليه٬ راه ربح. ربح الرأي العام. ربح تعاطف الناس. تكونات قناعة عند مواطنين باللي استهدافو فقضية “امنستي” والتحقيق معه فقضية قالت الحكومة ان لها علاقة بالتجسس٬ كلها خاوية. كلها وسيلة باش تضرب هاد الصحافي اللي فضح صحاب اراضي الدولة.

حتى المجلس الحكومي الاخير كان عمر الراضي فوضع صعيب. شوية وهو يخرج بيان الحكومة اللي رتبك اخطاء قاتلة لو طبق القانون كانت تسقط قضيتو مباشرة. جات الحكومة وخرقات سرية التحقيق واتهماتو بالتخابر كيف كتبات. صعيبة تقول لشي حد مخبر ويكون هاد الحد حكومة ماشي قضاء بعد تحقيق باشراف النيابة العامة. اخلاقيا رتكبات الحكومة خطأ اخر. بغات تنتاقص منو وقالت عليه “صحافي متدرب”.

البيان ديالها جا فيه “ومن جهة أخرى، =كتهدر على امنستي= بمحاولة استغلال وضعية صحفي مغربي متدرب ادعت أمنستي أنه تعرض لعملية التجسس المذكورة. وهو نفس الصحفي المتدرب موضوع بحث قضائي حول شبهة المس بسلامة الدولة، لارتباطه بضابط اتصال لدولة أجنبية، تتحفظ المملكة المغربية عن الكشف عن هويته الحقيقية، انسجاما مع أعراف وتقاليد المجتمع الدولي. وهو الضابط الذي كان موضوع تسريبات في يوليوز 2013 بهويته الكاملة، بعدما اشتغل تحت غطاء ديبلوماسي منذ 1979 في المناطق الساخنة عبر العالم”. كيفاش تتحفظ وكيفاش كتفرش كلشي وكيفاش قضية صحافي متدرب. راه اللي تقلل من شانو هي الحكومة. هو هاد البيان.

هنا بعد البيان عمر الراضي بدا يحقق انتصارات. بمعنى بدات فئة كتشكك فالفيلم كولو. جات قضية تصويرو بعد خروجو من بار مع صاحبو عماد استيتو وكملات الفيلم. 

صافي سالات اللعبة وطلعات الكتبة. تصورو كيفاش وصلات الحياة الخاصة جدا. اش كتشرب وفين كتشرب وعلاش كتشرب وكيفاش نطيحك وانت كتشرب. 

دابا اجيو كون كان هاداك اللي كيقول علي عمر الراضي السكايري اسلامي اكيد الفيلم غادي يكون مختالف. غادي يتشد الاسلامي وعند الدولة الصح تشدو٬ حقاش كيشكل خطر على كاع النظام العام وبدا كيدير الامر بالمعروف. البارح ومن خلال الفيديو اللي خرج ماشي التسجيل الصوتي راه كان فيه ديال الشي ديال بوليس الاخلاق فالسعودية قبل ما يجي هاد الامير ويطيرها. 

عمر الراضي بهاد الشي خرج رابح معركة الرأي العام. غادي يعطي لمنظمة امنستي المصداقية بعد ما كانت متهمة وباينة تقريرها كيف قالت الحكومة على لخوا الخاوي. غادي يعطي للصحف اللي نزلات علي المغرب المصداقية. غادي يضر بالبلاد. هاد البلاد ماشي بالصورة اللي صوروها هاد الصحف ولكن دابا اكداتها هاد القضية. ودابا فكها يا من وحلها