كود كازا//
طالبات لجنة التنسيق لعائلات المختطفين مجهولي المصير وضحايا الاختفاء القسري بالمغرب، بالتسوية الشاملة لكافة الملفات العالقة المتعلقة فملف الاختفاء القسري.
واستنكرات اللجنة “القمع والمنع واستعمال القوة فالتعامل مع مختلف الاحتجاجات الاجتماعية والحقوقية”، وطالبات بإطلاق سراح كافة المعتقلين السياسيين، مع إعلان تضامنها مع الصحافيين المعتقلين، عمر الراضي وسليمان الريسوني.
ونداء اللجنة هذا جا تزامنا مع عيد الشغل، اللي لقات فيه الفرصة باش تجدد مطالبها للدولة باش تشوف من حال الضحايا مجهولي المصير، ومختلف قضايا انتهاكات حقوق الإنسان السياسية والاقتصادية.
وعلنات اللجنة، فبيان ليها، على دعمها لتحركات الطبقة الشغيلة فظل الظروف الصعيبة اللي كتدوز منها البلاد بسباب “كوفيد 19″، الشي لي رافقو “تفاقم الوضع الاجتماعي الهش” بسبب تسريح العاملين وارتفاع البطالة وفقدان فرص العمل وتقلص الموارد المالية وضعف الأجور والتعويضات.
واعتبرات أن ملف الاختفاء القسري مازال مفتوح ومازال ماتماتش التسوية ديالو بشكل شامل.