هناء ابو علي – كود ///

الجمعة اللي فاتت خرج المتهم بالاغتصاب اللي كيتحاكم ففرنسا سعد لمجرد اغنية وهداها لمحمد السادس. دارها مع نيكولاس رييس احد اعضاء فرقة « دجيبسي كينگ » اللي كانت شهيرة فزمانها.

هاد الفنان المتهم فاكثر من قضية بالاغتصاب قال باللي هداها للملك محمد السادس بمناسبة الذكرى 23 لعيد العرش. غنى باللي “كل يوم يفوت علينا حبو فقلوبنا يزيد” وباللي “سنة بعد سنة لمحبة فيك تكبر” وباللي “حبيبنا الغالي ملكنا الغالي” وشطح وغنى الاسباني باللي عيد العرش يوم تاريخي ومصدر فخر وباللي جا حتى هو يحتافل ب”جبك يا سيدنا” وباللي ناشطين وهما كيغنيو باش يفرحو مجتمعين”.

المشكلة كيفاش واحد متهم فقضايا اغتصاب ففرانسا ماشي عندنا. هنا كاين شهادات وما عمرها وصلات للقضاء٬ كيفاش واحد بحالو يسمح لراسو يغني لرئيس الدولة. كان خطأ كبير نهار دار ليه محامي =وزير العدل الفرنسي الحالي ديبون موريتي= ومس صورة المغرب. ماشي قضية عادية. هو متهم باغتصاب فتاة فرنسية وضربها فاوطيل باريسي ليلة قبل حفل كان غادي يديرو تماك. تشد لفترة ودوز حبيبيس وبفضل وعورية المحاميين قدر يتابع فحالة سراح ومازال كيتحاكم حتى اليوم.

هادا راه امثالو فالغرب مسيرتو كتسالي. كبار دارو قل منو وما بقاش عندهم وجود. هاد المتهم بالاغتصاب دار البومات كثيرة وصور مع نجوم عرب ودول بحال تخلفنا كتعرض عليه باش يحيي مهرجانات ودابا كملها باغنية على الملك.

كان خاص لقصر يرفضها وما يخليهش يديرها. شوفو اش قال الملك فخطاب العرش نيت. اول موضوع هدر عليه هو المرأة. قال “بناء مغرب التقدم والكرامة، الذي نريده، لن يتم إلا بمشاركة جميع المغاربة، رجالا ونساء، في عملية التنمية” ودعا “لتفعيل المؤسسات الدستورية، المعنية بحقوق الأسرة والمرأة، وتحيين الآليات والتشريعات الوطنية، للنهوض بوضعيتها” وقال باللي مدونة الاسرة خاصها تعديلات باش تجاوز السلبيات والاختلالات اللي بانت فالتجربة ديال تطبيقهاورجع واكد باللي تقدم المرأة رهين بمشاركتها الفعالة فمختلف مجالات التنمية

تصورو خطاب بحال هادا ويجي يغني ليك فيه واحد تكرفص على لمرا. هانها. متهم باغتصابها. شهادات لمغربيات هدرو على هاد الاهانات. عندو جوج قضايا ففرنسا من نفس النوع.

لقصر ماشي هو اللي كيواقف على اش يتغنى او اللا. لكن باش تكون قضية فيها اغتصاب خاص ينبهو هاد المغني يبعد من هاد العينة من الاغاني.

غناؤو فعيد العرش اهانة لهاد العيد واهانة للمرأة للي دافع عليها رئيس الدولة. اهانة لينا كلنا وصافي.