عفراء علوي محمدي- كود//

اعتبر أمين رغيب، التقني الباحث فمجال المعلوميات وشبكات الاتصال، بللي التطبيقات كاتبلونطا على غفلة غالبا بسباب عدم حرص الموظفين ديال الشركات والتطبيقات الإلكترونية باش مايرتاكبوش أخطاء ممكن تكون فادحة وتخليها تتبلوكا جزئيا أو كليا.

رغيب قال، فتصريحو ل”كود”، بلي تطبيق “واتساب” عندو مجموعة من السيرفورات المتنوعها، أبرزها 3 سيرفورات رئيسية: سيرفور الاستبطان، وهو السيرفور الخاص بالاتصالات بالأوديو والفيديو، والسيرفور الخاص بالميساجات المكتوبة، ثم السيرفور الثالث الخاص بالميلتيميديا، وكايرجح راغب أن هاذ المشكل وقع فالسيرفورات المتعلقين بالميلتيميديا.

وأكد رغيب بللي موظفي التطبيق كايقومو بعمليات صيانة بشكل دوري لإصلاح بعض الأعطاب، من بينها الأعطاب للي كاتوقع فالسيرفورات، “وفهاذ اللحظة، خاص يتم استعمال النسخ الاحتياطية عوض الإصلاح المباشر، باش مايحسش المستخدم أن هناك خلل ما فالتطبيق، وبالتالي ماخصش السيرفور يوقف وخصو يبقى خدام”، على حد تعبيرو.

وقال رغيب بللي فالعالم كينين مئات آلاف السيرفورات، وكل سيرفور متخصص بواحد الجزء جغرافي معين أو أجزاء كثيرة حول العالم، “وبالتالي فمكن هاذ المشكل يوقع فمناطق مختلفة فالعالم، لكن هاذا ماكيعنيش أن كلشي يعاني من نفس المشكل”، على حساب هضرتو.

للإشارة، هاذ الصباح بزاف ديال مستخدمي تطبيق “واتساب” فكاع أنحاء العالم لقاو مشكل كبير باش يسيفطو الأوديوات والتصاور.

والناس لقاو صعوبة باش يسيفطو التصاور ف”واتساب”، فاكتفاوا بالنصوص فقط أو بالبارطاج ديال صور ديجا منشورة فالتطبيق، وحدين خرين ماقدروش يصبرو، ودازو ل”تويتر” و”فيسبوك” يحتجو عن طريق هاشتاغ #WhatsAppDown.

ولحدود الساعة، المسؤولون على “الواتساب”، للي تابع لشركة “فيسبوك”، مازال ما وضحوا طبيعة المشكل والأسباب ديالو.