السعودية طلبات كثر 33 ألف واحد يرجع طوموبيلاتهم “الهاي كلاس”.. مهددين بالكسايد ومشاهير ونجوم حتى هما معنيين
كود الدوحة ت الوكالة المغربية للصور الصحفية ///
نهار تأهل المنتخب المغربي لكرة القدم لثمن النهاية كأس العالم لكرة القدم بعد ما ربح كندا فملعب التمامة فقطر هز ياميق مدافع الاسود راية فلسطين. اللحايا والقوميين والاسلاميين لخصو فوز الاسود التاريخي والتأهل للثمن فهاد الصورة ديال ياميق وفصورة غاديين يسجدو فيها. حتى هادي عادة جديدة عند الاسود.
البارح 6 دجنبر بعد الانجاز التاريخي والتأهل للربع٬ كانت جوج رايات دخلات مع راية بلادنا. راية فلسطين هزها شي حد وراية امازيغ ديالنا حتى هي وهزها الحارس لمحمدي.
هاد الشي كان خاص الجامعة تحسمو. كاع الاتحادات ديال الكورة دايراه. ممنوع شي راية تدخل مع راية لبلاد. عندنا غير راية حمرا فيها نجمة خضرا. حنا امازيغ ومفتاخرين كيف ما حنا عندها مغاربة من اصول عربية واخرى افريقية…. وفينا حتى اصول اوربية٬ لكن اليوم كاينة دولة اسمها المغرب وراية رسمية. علاش نهزو شي راية من غير رايتنا.
هاد الراية الفلسطينية راها اختلاق قطري محض. بدات بالشارات كيديروها فيدهم ليسرا. علاش؟ داروها ماشي حب ففلسطين ولكن كردة فعل على قرار منتخبات اوربية تحمل شعار لدعم المثلية يديرو عميد المنتخب فيدو. هنا دخلات الفيفا وهددات اي واحد يدير هاد الشارة بالانذار. تراجعات المنتخبات الاوربية خاصة الانجليزية والالمانية والدنماركية… من بعد بدات فقطر حركة مضادة. مشات لفلسطين. اش لاح فلسطين لموضوع المثلية؟ سولهم هما.
باش لمغاربة يبداو هازين هاد الشعار وفهاد المعركة راه ماشي ديالنا. لمغاربة كيدعمو فلسطين ومع قيام دولة فلسطين ومع التقارب المغربي الاسرائيلي ولكن قبل من هاد الشي كولو هما مغاربة خاص راية وحدة ووحيدة.