الرئيسية > آراء > علاش كان على ‘ماء العينين’ تعلن على أفكارها الجديدة؟
08/01/2019 12:00 آراء

علاش كان على ‘ماء العينين’ تعلن على أفكارها الجديدة؟

علاش كان على ‘ماء العينين’ تعلن على أفكارها الجديدة؟

ع بن أحمد-كود//

من الواضح ان اللي واقع للسيدة  اَمنة ماء العينين انها دارت مراجعة فكرية و سياسية و مابقاتش كتاَمن بمشروع الحركة الاسلامية كليا  و ربما ببرنامج الحزب ديالها ف  شقه المحافظ ..

وهادشي عادي بزاف ، العدبد من الناس  و بشكل يومي كيبدلو افكارهم و قناعاتهم.. و حتى السياسيين منهم ف العالم كله،  و الاسباب متعددة، ربما التجارب د الحياة و الارتقاء الطبقي و تحسين مستوى المعيشة او العكس،او بكل بساطة قراءة ف كتاب او مشاهدة فيلم تخليك تبدل اراءك، بل ببساطة شديدة راه تقدر تلاقا وجه بوجه بشخص عندو افكار كنتي تعتبرها معادية ليك، ولكن ملي تلاقا به  مباشرة يقدر يغير ليك نظرتك للحياة، وهاشي علاش دايرين الناس دورات كايتعملو فيها تقنيات المرافعة و اللوبينغ  على شي قضايا..خبراء متخصصين كايعلموك كفاش تتصل بالسياسيين و تقنهم يدافعو على قضيتك ف البرلمان او الحكومة الى اخره..

وحتى ف المغرب ، من زمان و تاريخيا بلا ذكر الاسماء و الامثلة كتلقا يساري تبدل ولا يميني.. و ثوري ولا إصلاحي محافظ ، او المهادن للنظام و خادمه  ولا انقلابي ف رمشة عين.. ، و  على المستوى الديني الفكري كتلقا ملحد يولي متدين و يمشي يحج و العكس صحيح ، شحال من متدين ولا ملحد .الراس اللي مكيدور كدية قالو زمان، و اكبر دليل على هاد التحولات الفكرية هو ناس حزب البام براسهم اللي فرحانين دابا و شامتين ف السيدة ماء العينين..شوف كيفاش تحولو  -و اقصد قياداتهم- من اقصى اليسار و الفكر الجمهوري الماوي الثوري اللي بسببه دخلو للسجون الى اشرس المدافعين على الملكية باصالتها ومعاصرتها..

لهذا كان على السيدة ماء العينين  ان  تعلن  بشجاعة على افكارها الجديدة للناس اللي كايعرفوها بما أنها شخصية عمومية و الاهم  للناخبين ديالها اللي صوتو عليها  و صوتو على برنامج حزبها من خلالها،تعلن ربما في رسالة مكتوبة او مرئية او مسموعة لا يهم، وتقول علاش وكيفاش بدلات افكارها و قناعاتها و تدافع عليها كما دارو بزاف قبل منها وممكن ايضا  تستقل كاع من مناصبها الحزبية و تمارس السياسة وفق افكارها الجديدة.. فهي امرأة ذكية و عندها كاريزما و قوة حضور وتقدر تفرض راسها ف اي حزب مناسب لقناعاتها الجديدة و الساحة المغربية ماخاصنيهاش احزاب ولا حركات ..ولكن يبدو انها تعطلات ف هاد الcoming out  ان صح التعبير لسبب من الاسباب و حاولات تعيش بازدواجية مابين الرباط و باريس لفترة قصيرة او طويلة  و هادشي عطا فرصة لاعداء البيجيدي يحاولو يفسرو الموضوع تفسيرات اخرى… مثل ان كاع اعضاء الحزب منافقون و يقولون ما لايفعلون وغيرها من التعميمات.

مايقع الان، اي الحملة الشرسة الاعلامية ، غادي يخلي بزاف الناس من السياسيين وخصوصا العيالات يخافو من انهم يعلنوا على افكارهم و تحولاتها… او غير يزعمو يحيديو الحجاب وقتما بغاو..

و للاسف المنطق  حاليا اللي وراء التشهير بالسيدات اللي حيدو الحجاب غادي يكون اشد قمعا من الحجاب نفسه.

موضوعات أخرى

28/03/2024 12:30

من هنا لسيمانة.. اللي عندو شي طوموبيل أو موطور ففوريانات كازا ومجاش سحبهم غيتباعو

28/03/2024 12:20

جنايات فاس فرقات 33 عام ديال الحبس على ريزو د التهجير السري وها التهم اللي تابعوا بها

28/03/2024 12:19

ليلة “العشاء الأخير” فحزب الاستقلال: هادي 3 قضايا كبرى غادية تشعل حروب ف “الميزان” قبل وبعد المؤتمر

28/03/2024 12:10

جوندارم الدروة طيحو  بزناز عندو الحشيش والبوفا والغبرة والقرقوبي نواحي برشيد

28/03/2024 11:30

فهم تسطى مع نظام العسكر.. الجزائر عينات جوج قناصل فالمغرب واخا دايرين القطيعة معانا