كود هناء ابو علي ///

اللي كيدوز من طنجة او كيزورها كيشوف مدينة غادية وتزيان. طنجة غادية وتعلى بصاح. مطلعة النيفو. الرباط عايشة نفس الايقاع. منظمة مقادة. فالمقابل كازا فوضاها كتكبر عام بعد عام. هاد الشي لاعب فيه والي الجهة دور كبير.

فطنجة وفالرباط كاينين ولاة قافزين. خدامين. عقلتو نهار تقطع الضو على احياء فالرباط وتمارة. شكون خرج ومشى بالليل لمحطة ريضال اللي وقع فيها المشكل؟ والي الجهة محمد اليعقوبي وقف بيدو باش يتحل هاد المشكل. حتى وزير الطاقة ما بانش ديك الليلة٬ بلا ما نهدرو على عمدة لمدينة اللي عاطياها لمعاطية مع الصحافيين. العمدة عندو هامش للتحرك ولكن خاصو يكون فيدو.

تنظيم الرباط مقاد بسباب هاد الوالي.

فطنجة لمدينة كتبان مقادة. زوينة. منظمة. بحال ايلى كل نهار كتسنى رئيس الدولة الملك محمد السادس يزورها. غير هي مقادة بسباب تواجد والي جهة طنجة تطوان الحسيمة. شفنا اخيرا انشطة رياضية كبيرة منها ماتش المغرب ضد البرازيل وكلشي داز مزيان. علاش؟ حقاش الوالي امهيدية محمد واقف على الشادة والفادة. ديما فالتيران. تلقاه فالشاون او العرائش ايلى شعلات العافية فشي غابة. تلقاه فطنجة ايلى كان شي حدث رياضي. تلقاه فتطوان. تلقاه فالحسيمة.

تلقاه فطنجة فالليل كيدور ولا بان ليه شي منظر فشي شكل كيعلم السلطات وكدخل فديك الساعة. شوفو كيفاش داعم حتى اتحاد طنجة باش جابت رئيس جديد. شفنا فرقة اخرى وعندها حظوظ ما طيحش للدوزيام ديڤيزيون بعد ما كانت لدورات كثيرة هي اللخرا.

دابا هادو نماذج ولاة كيخدمو. خاصهم عمدات عندهم نفس الطاقة والرغبة فالخدمة. دابا هادو واخا العمدات ماشي قافزين شي فقوزية ومع ذلك شوف طنجة والرباط كيف دايرين.

فكازا كاين حميدوش والي الجهة. مخزون فمكتبو. ما كيخرجش. كازا واقفة فمشاريع كثيرة كتكون محتاجة لوالي قافز باش تتحرك.
كيبان باللي الداخلية من عهد ادريس بنهيمة ما رسلات شي والي حار ديما خارج وباغي يخدم الشأن العام. ديما من نصيب كازا ولاة ضعاف فشي شكل كاع.

علاش ما يتمش تعيين والي قافز حراقية فالخدمة. ما عندو مكتب. كيدور منطقة منطقة فالجهة. يبدا يحل مشاكل كازا ويدوز لسطات والجديدة وبرشيد والمحمدية…. خاص بروفيل بحال اليعقوبي او مهيدية لهاد المنصب.