كود مصطفى الشاذلي ///
مرة اخرى غاديين نضيعو فرصة للنقاش. للنقاش الصحيح. مرة اخرى غادي تقتل تفاهات بحال اللي قالها هاداك صحافي « ميدي 1 تيفي » نوفل لعواملة. اللي خرج من مهمتو كصحافي وولى مدرب وقال ليك ما نبقاش نغطي ماتشات الاسود. بحال ايلى كاينة السيبة فهاديك القناة. يدير ما بغى وقت ما بغى.
كلشي تخلط. المنتخب تقصى. الاقصاء كان قاصح على لمغاربة. شعب كيقلب على فرحة يسكن فيها مشاكلو. باغي مسكنات لاحباطاتو الكثيرة. كلشي معول على الكورة تلعب دور اكبر من دورها. غير نساو بزاف واش حنا شعب كورة.
واش عندنا تاريخ فالكورة. كلشي عارف باللي حنا ما عمرنا كنا فافريقيا الا منشطين ل « الكان ».
ربحنا واحد ف1976 ولعبنا نهاية وحدة فتونس و3 مرات مشينا لنصف النهاية. حنا ماشي الكاميرون ماشي مصر ماشي غانا ماشي الكوت ديفوار ماشي حتى الزايير سابقا والكونغو الديموقراطية حاليا.
اليوم كلشي تبدل. تبدل نتيجة لهجرة ابناء القارة الافريقية الى اوربا. وصلات للجيل الرابع فشي بلدان والثالث فبلدان اخرى. ملايين الافارقة بحسب قوانين الفيفا سمح ليهم يختارو بين منتخب بلدهم الاصلي ومنتخب البلد اللي عايشين فيها.
هاد الشي غير الكورة الافريقية. لمغاربة فالخارج عددهم 5 مليون شخص. فيهم لعابة مشاهير قبلو يلعبو للمنتخب المغربي لكرة القدم. هادو مكونين مزيان. مكونين ففرانسا فهولندا فاسبانيا فبلجيكا فالمانيا وغدا غادي يكونو عندنا جيل جيد مكون فايطاليا اللي كانت فيها هجرة المغاربة متاخرة مقارنة بفرنسا وبلجيكا.
هادو ديما غاديين يشكلو العمود الفقري للاسود. علاش حقاش كاع الدول بحال الجزائر اللي محيحة اليوم فالكان: جوج لعابة اللي اولاد البطولة المحلية والباقي بما فيهم جمال بلماضي تزادو فاروبا وخاصة فرانسا.
هاد العقلية ما يمكنش يكون مدربها من لبلاد. خاصو يكون كيفهم هاد العقلية. ماشي الزاكي او غيرو. مصطفى حجي ممكن. كنقولو ممكن. يكون مدرب للاسود شي نهار.
المغرب خرج خرجة فشي شكل من كأس افريقيا. لعب الماتشات الاولى مقاد والبيلانتي ديال زياش كون دخل كلشي غادي يتغير. فالتاريخ كي الكورة ما كاين بلاصة ل »كون ».
دابا كاينين نقاشات غريبة. كلشي عارف كيفاش كيتعين رئيس الجامعة الملكية لكرة القدم فالمغرب وحتى حد ما يقدر يقولها. واش ممكن تكون الديموقراطية فهاد الجامعة؟ اللا حقاش غادية تجيب كوارث اكثر. الديموقراطية فالبلاد بحال الكورة خاص نوجدو ليها التربة. شوفو غير رؤساء الاندية باش تعرفو مع من حنا. كارثة بكل المقاييس. باش طالعين. ظاهريا بالديموقراطية.
واش المغرب ممكن يكون دولة كرة القدم؟ اللا. ماشي غير جي وكون دولة كورة. تبغي الكورة ما كيعنيش دولة كورة. وعلاش يكون عندنا تكوين مكلف بزاف بزاف وحنا عندنا خزان كبير من الطاقات من هاديك 5 ملايين مغربي من مغاربة العالم. الا الي كنا نعتابروهم اجانب وفهاد الحالة خاص تغيير فقانون الجنسية المغربية. ما يمكنش نقبلو فلوس هادو وباش يختار شي حد منهم يلعب مع الاسود نقولو راه اجنبي. هادي قضية هوية كبيرة ومعقدة.
باش نعرفو شكون حنا بصاح ممكن نبداو النقاش. ممكن يكون نقاش صحي. ما يمكنش تطلب نقاش مقاد فبلاد ماشي مقادة. الكارثة كلشي عارف باش مسگية ولكن حتى حد ما قادر يهدر.
ديرو بحث فين ما بغيتو غادي يخرج ليكم لخواص. فالكورة من الجمهور حتى الاعلام بكل انواعه ودوزو على التكوين والتدريب وادارة الاندية والتمويل والتسويق… كلشي مسوس كلشي مغشوش.
