سهام البارودي – كود//
علاش عباد الله مازال كايجبدو الماضي الاستعماري ديال فرانسا علاش زعما ؟! مافهمتش هاد النزعة لي عند العرب لأنهم ديما يرجعو اللور ! اللور بزااااااف باش يبررو شي حاجة لي كاتوقع دابا ! علاش نتوما بوحدكم لي مازال هازين فقلبكم ؟! المغرب براسو راه كان دولة استعمارية واحد الوقت و دخلنا بصنادلنا تال سبانيا و السينيغال هججناهم و ديناليهم عيالاتهم و اسرناهم ! اما الاستعباد و تجارة الرقيق ماغاندويش على الباع الطويل ديالنا فيها حيت تقدر نتا نيت جداك و لا جدك نلقاوه جابو شي واحد غا بالگرصون للمغرب بخرصة فودنو من غانا و لا السينيغال!
-المانيا و فرانسا تقاتلو و طاحنو و دارو بيناتهم حروب ديال الله و الحق و الجنود الالمان دخلو اغتاصبو الفرنسيات فعقر باريز
-الشينوا و الجابون تاهوما دوزو حقهم من التطاحن و الحروب و شي ماكان كايحمل شي !
النگليز و فرانسا كانو واحد جوج كاينوضو يهجمو على بعضياتهم و يقلبوها سباط ! المياه ديال البحر لي بيناتهم مازال لدابا فيهم الحطام ديال السفن لي دگدگو فالحروب!
و هادشي ماكايمنعش انه هاد الدول اليوم كاتبني علاقات مع بعضياتها ! حيت العلاقات بين الدول ماش هي العلاقات بين خالتك نعيمة و ربيبتها زروالة لي مقاطعين الهضرة من نهار زروالة نتفات نعيمة فالحمام و دفعاتها فالبرمة !
العلاقات بين الدول كاتبنى على المصالح السياسية و الاقتصادية ! العلاقات بين الدول كاتبنى على البرغماتية !
و حنا ولاد اليوم ! انا و نتا و نتي لي كاتقراو هادشي دابا ماحضرنا لا لستعمار لا لحملات صليبية لا لحرب عالمية ! لا للتاخرية من هادشي ! علاش اليوم غاتفكرني بالماضي الاستعماري لفرانسا ؟
Qu’est ce qu’on s’en fout
آ نمي !
On s’en fout !
فاش كاندويو على الارهاب لي كاتعاني منو فرانسا اليوم فعقر دارها و كاتجي نتا تعوج الهضرة و تقوليا واااراااه فرانسا عندها ماضي استعماري !راك كاتبرر الارهاب ماكاين ما ولكن!
و أنا كشابة مغربية من مواليد الثمانينات ماعندي حتى علاقة لا من قريب و لا من بعيد مع فترة الاستعمار و ماحضرتش ليها فحالي فحال الاغلبية الساحقة د المواطنين المغاربة اليوم ! بالعكس انا كانبغي فرانسا و كاتعجبني فرانسا بثقافتها و رقيها و تقدمها و فلاسفتها ! كاتعحبني فرانسا بالدور ديالها الكبير لي لعباتو فالتحرير ديال المرأة فالعالم بصفة عامة و فالمغرب بصفة خاصة !
و غاندافع عليها ضد الهمجية و ضد الارهاب!
