محمد سقراط- كود

—

أغلبنا متبع هاشتاغ    #me_too والفضائح ديال الإغتصاب لي جر معاه ، ومن خلال تفاعل الناس والإعلام والمجتمع المدني ، بزاف ديال الناس لي تذكرو أو تجبدات سميتهم ففضائح جنسية ديال التحرش أو الإغتصاب ، المجتمع رد الإعتبار للنسا لي تعرضو لداكشي من طرف هاد المشاهير ، والعديد منهم إما جراو عليهم من الخدمة طلقوهم عيالاتهم قاطعوهم الناس ، فقدو مكانتهم الإجتماعية ، إلا عندنا حنا فمستنقع الظلام والبدونة هذا ، بزاف ديال رجال الدين مثلا لي خرجات عليهم فضائح جنسية ومع ذلك كتدخل للصفحات ديالهم على المواقع الإجتماعية ، كتلقى الناس كيساندو فيهم ومعتابرين الأمر هجوم على الإسلام والمسلمين بحال الى قضيب طارق رمضان او الفيزازي هوما لي كيمثلوا الإسلام ورافعيين رايتو فالغرب .

الجنس عندو مكانة كبيرة فالإسلام ، لدرجة أنه جزاء فالجنة والغاية من كاع هاد التعبد والإيمان والإستشهاد راه هو الراحة والسياحة والحوريات  والنيك ليل ونهار، وفالدنيا كاين عرام ديال التشريعات الإسلامية لي كتسهل ممارسته وفنفس الوقت كتعاقب على ممارسته خارجها ولكن بشروط تعجيزية ، وجزء من العقيدة الإسلامية راه التكاثر والولادة وزيادة عدد الأمة الإسلامية ، والرسول كيقول تكاثروا تناسلوا فإني مباه بكم الامم يوم القيامة ، غادي يفتاخر بينا الى كثرنا ، وطبعا هادشي لي مخلينا كشعب و كأمة عندنا هوس بالجنس ، والدليل هو أننا فالمراتب العليا فالبلدان لي كتفرج البورنو ولي كتعاني من التحرش فالشوارع وعدة آفات جنسية خرى ، وطبعا الدعاة الإسلاميين ماخارجينش من هاد القالب ، بل أكثر العديد منهم عندهم سعار جنسي وسلسلة فضائح متتالية بحال الى مكملين على الفتوحات الإسلامية ولكن بقضبانهم .

الموشكيل الكبير ماشي فيهم ، بل فالأتباع ديالهم للي مآمنين بقدسيتهم وبتعاليهم على ما يتهمون به، لدرجة بزاف كيعتابرو الأمر تهجم على الاسلام ورجالاته ، وشحال من واحد متيق أن حنان الزعبول غير قالب أو مسيفطينها العلمانيين والماسونيين باش يتفضح الفيزازي ، وكذلك لقيت تعليقات قريتهم عند طارق رمضان أغلبهم فيها تشجيعليه و ان الأمر يا يعدو أن يكون مؤامرة من الغرب الكافر لضرب رجالات الإسلام ، وهادشي هو لي كيعطي دافع للعديد من رجال الدين أنهم يحسرو براسهم فوق القانون ويديرو آش بغاو ويمارسو أمراضهم براحة تامة ، مادام أن جماهيرهم العريضة كتعتبرهم معصومين من الخطأ .