كود اسماء غربي ////

وزير الدولة المكلف بحقوق الانسان مصطفى الرميد ناوي على الاستقالة. هاد الشي ما فيه شك. السيد ما عاجبو حالو فهاد الوزارة ولا هاد الحكومة. الرميد اصلا ما كانش باغي يكون فهاد الحكومة. ربما هو الوزير الوحيد فالعدالة والتنمية اللي دافع عليه بنكيران يكون فهاد الحكومة واللي ظل بعيد على تشكيلها. ابن عرفة كيف قال فتصريح سابق معول عليه يسخن كتافو ويتحامى معاه على اخنوش =كيف قال هو=. ماشي غير هادو اللي بغاوه يكون فالحكومة. القصر حتى هو بغاه.

ما ننساوش ان الرميد لعب دور كبير فهاد الشي ديال حكومة ابن عرفة. بعد كل المعيقات اللي دارو لبنكيران كان عندو دور باش يجي ابن عرفة ديال البي جي دي. هو ما قبلش هاد الدور. الرميد كان حاضر فتعيين بنكيران. اللقاء اللي دار فيه امور كثيرة مازال ما كشفش عليها لا بنكيران لا الرميد لحد الان.

بعد كل ما قام به الرميد كان يعول على تعامل محترم من الجهات اللي قدم ليهم خدمات. فكرتو واضحة كانت “الدولة دولة ببنكيران او لا بيه غادية وخاصها تمشي. ايلى كان رفض ليه او معيقات للعمل خاص ندوزو لامور جديدة”.

جا الريف وكان عندو موقف جريء مقارنة مع باقي اعضاء الحكومة. كتب تدوينات قاصحين. رسل رسائل لعدة جهات باللي ما يمكنش يقبل الصمت. فالريف دخل وتلاقى مع الجمعيات ورفض يحضر لقاء نظماتو جهة طنجة الحسيمة تطوان حول الريف وهو اللقاء اللي كان فاشل. الرميد بغى يدخل بخيط ابيض لكن الخطاب الملكي الاخير لعيد العرش يوم 29 يوليوز وانتقادو للاحزاب السياسية بقسوة ما يمكنش يعجبو ولا يعجب شي سياسي.

طلب تمتيع سيليا بالسراح =متابعتها في حالة سراح ورفضو ليه حتى جا العفو وخرجات. علاقتو بوزير الداخلية عبد الوافي لفتيت ماشي حتى لهيه. هاد الاخير وفق مصادر “كود” ما حملوش نهار جبدو وقال باللي ما عجبو حال على فيديو الزفزافي. الرميد قلقو بزاف الفيديو وقلقو انو التحقيق ما دار والو لحد الان.

الرميد عاق باللي هاد الحكومة غادية للحيط وما فيدهاش واخا لعب اكبر دور فخروجها. هاد الشي علاش غادي يغادرها باش ما تحسبش ليه. رسالتو رد على الخطاب الملكي بشكل من الاشكال. باش ما نقدرش نخدم ونمارس مهامي كيف بغيت نمشي فحالي احسن. هاد الشي علاش غادي فحالو