سهام البارودي – كود//

كاينين جوج ديال النماذج كون ماكانوش فالمغرب كوراحنا بيخير و على خير احسن بزااااف من الحالة لي حنا فيها !دوك الامهات لي كايخرجو مورا شي ولد شمكار داير شي مصيبة كحلة يبكيو و يقولو ليك “ولدي زوين و ظريف و مؤدب مايديرهااااش” و شي لحايا لي فوقما تفرگعات شي قنبولة فصفهم و لا قريبة ليهم كايضربوها بنكرة و كايديرو ديك القضية ديال “لن نسلمكم اخانا” و بصح راه نيت طلاونا بإيخانا ديالهم!

من مورا ماتفجرات قضية الامام لي غتاصب البنات فالشمال! و بداو وسائل الاعلام كايدويو عليها ! شي لحايا خشاو زكهم فالتراب فحال ديما فاش كاتفجر شي فضيحة مولاها لابس شي عباية د الدين كايديرو راسهم ماشافوهاش حيت كايحسو بلي داك لوفون دو كوميرس ديالهم تقاس فكايخشيو راسهم فالتراب تادوز الموجة و يطلعو عاوتاني يبيعو و يشريو فالدين! اما شي وحدين اخرين خرجو عينيهم و ناضو كايطبقو ديك القضية ديال انصر اخاك ظالما او مظلوما و سبقو هوما الخدمة د الشرطة و القضاء و دارو استنتاج على انه الامام مادار والو و هادشي كولو راه غي  مؤامرة لتلطيخ سمعة “الإمام” و رجل الدين بصفة عامة و حقا و الواد تلطيخ سمعته و القضاء على “القدوة” و شي هضرة غليضة كايطيرو فيها!

وا سيموحمد ! واش الإمام ماشي بنادم ؟ ماكاينينش أئمة كذابة !؟ ماكاينينش أئمة نصابة ؟ و لا كايديرو السحور ؟! و لا مغتصبي أطفال ؟! راه محاضر البوليس و الاخبار فالصحافة الوطنية عامرين بقصص الائمة لي شدوهم كايحويو عيالات الرجال فالجامع گاع ! و الأئمة لي حصلوهم كايتكرفصو على الدراري الصغار … غانكذبو حنا باش تبقاو نتوما مرتاحين و محافظين على ديك الصورة الكذابية لي بغيتوها تكون على الإمام ! مايمكنش !

التفسير الوحيد لي كاين لهاد ردة الفعل هوا انه هاد الناس بغاو يعطيو لراسهم واحد القداسة ماعمر جد بوهم ماغاياخدوها ! بغاو يدوزو فوجه الدين و ياخدو بيه الحصانة و يديرو مابغاو ! آ و الله يا مك و دير شي مصيبة كحلة تا فحالك فحال خوتك يسيفطوك للغباقي ! و گاع لي مسبقين الدفاع على الامام د الشمال ماشي غرضهم قرينة البراءة باكثر ما غرضهم انهم غدا و لا بعدو لاناضو تكرفصو على بنات الناس تاهوما يلقاو الحصانة ديال “الدين” فصفهم.