اسماء غربي – كود//

المغني حاتم إدار لي دار كسيدة خايبة هادي تقريبا شهرين، وماتو فيها 3 ديال البنات، خرج أغنية جديدة وفرحان بالنجاح لي حققتها والتفاعل، ولكن في المقابل عائلة البنات معجبهمش الحال حيت باقة الحرقة فيهم.

التبركيكة لي جابت “كود” كتقول أن العائلات لي كيطالبو بالسجن ديالو وكيتاهموه أنه مسؤول في الكسيدة، بغاوه على الأقل يحتارم الحزن ديالهم ماشي يخرج أغنية بحال الا حتى حاجة ماواقعة.

وواخة العائلات متشبتين بكلامهم، حاتم إدار لي سمع ليه وكيل الملك هادي 15 يوم، أكد انه بريء ومعندو علاقة في الوفاة وأن الحادثة اثرات فيه نفسيا لكن خاص يكمل حياتو.

الأغنية سميتها “بنت الباطرون” تشافت حوالي 400 ألف مرة في اليوتوب في 3 ايام.