كود- عن LCI//
نهار السبت، طيارة تابعة ل”ريان إير” غادية من فرانسا للمغرب، قلعات قبل الوقت، بلا ما يتمكنو الخمسينات من المسافرين من السفر على متنها.
الطيارة كانت قلعات فالصباح، من مطار تولوز بلانياك فاتجاه مطار فاس سايس، قبل 15 دقيقة من الوقت الأصلي ديال الرحلة، الشي اللي خلا الناس اللي قطعو ليها يتقولبو، وخا منهم اللي كانو كيتسناو فالمطار لكثر من ساعتين.
واحد من الركاب صرح، حسب LCI، أنه كان من المفترض الطيارة المعنية تقلع مع 7:25 ديال الصباح، لكن تم إبلاغهم فقاعة المغادرة بللي الطيارة اللي باغيين يمشيو فيها قلعات مع 7:10.
الركاب دارو حالة فالمطار من بعد ما ساقو الخبار، وتعصبو واحتجو، فالوقت اللي كان من الصعب عليهم يهضرو مع إدارة الشركة فداك الصباح، وماستطعوش يتواصلو مع ممثل الشركة أو صحاب خدمات المسافرين.
مع ال11 داك الصباح، الشركة تفاعلات مع المطالب ديال المحتجين، وواعداتهم بللي غترجع ليهم فلوسهم، واخا بعضهم ماكانش راضي على هذ الاقتراح، وطالبو باش يمكنوهم من الوصول للوجهة ديالهم فأسرعوقت ممكن.
