كود – وكالات //
كشف الدكتور فيليب كوزمينكو، أخصائي أمراض القلب والأوعية الدموية، أن الناس لكبار واللي كايعانيو من أمراض فـ القلب مامزيانش ليهم يمارسو الجنس فاش يكون الجو سخون.
وزاد الدكتور، فحديث لراديو “سبوتنيك”، أن ارتفاع درجة حرارة الهواء لأكثر من 30 درجة مئوية، يعتبر من عوامل الخطر.
وزاد، “كايشكل الماء فالمتوسط 60 فالمية من جسم الإنسان، وفاش كانعراقو هاد النسبة كاتنخفض، وكانفقدو الما اللي فـ ذواتنا وكاترتفع كثافة الدم، وهادشي كايزيد عند الناس اللي كايعانيو من أمراض القلب والأوعية الدموية. واللي كايدل عل هادشي هي كثرة حالات احتشاء عضلة القلب (انسداد أحد الشرايين التاجية بشكل كامل ومفاجئ) عند الناس الكبار فاش كايمارسو الجنس”.
وقال أن الجنس نشاط بدني، وماخاصش الناس الكبار، واللي كايعانيو من أمراض القلب والأوعية الدموية يكثرو منو، أما الناس اللي عندهم كثر من 40 وماكيعانيو من حتى مرض خاصهم يخففو شهوتهم الجنسية فاش يكون الحال سخون، وضروري يديرو فحوصات مرة مرة باش يتأكدو من حالتهم الصحية.