تمويل مول “الشروق”. بوصوف باغي يخلع القضاء بالرسالة الملكية: غير خرج خبار التحقيق معاه نشر رسالة للملك فالفايسبوك وسبونوسوريزياها
سهام البارودي-كود//
البارح ضربت دورة عند بعض الخوانجية و اللحايا فالفايسبوك باش نحاول نفهم السلوك ديال خوتهم لي خرجو فطنجة و فسلا و فاس … عالله و عسى نلقى شي تفسير و نفهم شنو وقع!
اولا كلهم ! دوك الريوس الكبار ديال السلفية و الخوانجية كايشجبو و كاينددو بداكشي لي وقع ! ايوا شنو ! هاهوما گاع متافقين واش غايقولوها طاي طاي ؟! مالهم مسطين ! طبعا غايشجبو و يستنكرو و يبانو مقلقين من داكشي لي دارو بعض ” المستهترين” كيما كايسميوهم!
ولكن لي لاحظت ايضا ! انهم كايفسرو داكشي لي وقع بالدعوة لغناء النشيد الوطني و كاتلقا الاخ ابو حذيفة مكومونطي للاخ ابو هنيهة كايقوليه ” وا هادشي كامل بسباب هادوك لي ناضو غناو النشيد الوطني” ” وا شفتي هادشي داروه هادوك لي خرجو غناو النشيد الوطني” ” وا كون ماخرجوش مالين النشيد ! مايخرجوش هادوك الاخرين” فحالا غناء النشيد الوطني ولا اليوم استفزاز !
وا سمعي على ودنيك آ الدولة ! بنادم كايدخل و يخرج فالهضرة و حيثما و إنما و ما فتأ و فاللخر كايقوليك ” كون ماخرجوش يغنيو النشيد الوطني”
طبعا من حقك تغني النشيد الوطني و لا ماتغنيهش حتى واحد ماغايفرضو عليك ! و لكن بلاتي نطرح عليك واحد الاسئلة
ايمتا ولا النشيد الوطني لي هوا رمز من رموز الدولة استفزاز ؟
فوقاش كان غناء النشيد الوطني شي حاجة خايبة ؟
و شكون هادو لي كايشوفو فيه استفزاز ليهم ؟
و علاش هاد المقارنة بين النشيد الوطني لي كايمثل الوطن و الدعاء و الابتهال لي كايمثلو الله ؟!
وواش كاتآمنو بشي حاجة سميتها الوطن ؟ البلاد ؟ الارض و الثرات و التقاليد و العادات و الكرعين و الگديد و كسكسو و التقيتيقات لي كانتقاسموها كاملين كمغاربة و لي كايشكلو جزء من الهوية ديالنا ؟! ايوا راه النشيد جزء من الوطن !
لاكانو هادو لي خرجو البارح فطنجة و فاس و سلا خرجو من دايتهم لراسهم راه مصيبة كحلة ! و لا كانو خرجو حيت ” غناء النشيد الوطني” استفزهم راه مصيبتين !
انا فنظري اي واحد كايشوف انه النشيد الوطني “مستفز” و كانسطر على ” مستفز” خاص اعادة النظر فيه و فانتماؤو و فالايديولوجية لي حاملها !