الرئيسية > كود سبور > طامع فتعامل استثنائي من دون الناس.. دجوكوڤيتش مزال حاصل فمطار “ملبورن” ودفاعو: اللعاب خدا شهادة طبية كتعفيه من الڤاكسان لهاد السبب
08/01/2022 22:00 كود سبور

طامع فتعامل استثنائي من دون الناس.. دجوكوڤيتش مزال حاصل فمطار “ملبورن” ودفاعو: اللعاب خدا شهادة طبية كتعفيه من الڤاكسان لهاد السبب

طامع فتعامل استثنائي من دون الناس.. دجوكوڤيتش مزال حاصل فمطار “ملبورن” ودفاعو: اللعاب خدا شهادة طبية كتعفيه من الڤاكسان لهاد السبب

كود سبور – وكالات //

اليوم السبت قدمو المحامين ديال نجم التنس الصربي نوفاك دجوكوفيتش، وثائق لمحكمة أسترالية، كيقولو فيها بللي اللعاب عندو “شهادة طبية كتعفيه من أنه يدير الفاكسان ضد كورونا”، بعدما تصاب بالفيروس نهار 16 ديسمبر 2021، وهي باش خدا ڤيزا مؤقتة فاللول باش يدخل لأستراليا قبل ما يتمنع فاش وصل.

وكانو جوج لجان طبية مستقلة تابعين للهيئة المنظمة لبطولة أستراليا المفتوحة للتنس، عطاو “شهادة الإعفاء” لدجوكوفيتش.

ولكن السلطات الأسترالية من بعد منعات صاحب الرتبة اللولة عالميا من دخول البلاد باش يشارك فبطولة أستراليا المفتوحة للتنس (اللي ربحها 9 دالمرات)، مباشرة بعدما وصل لمدينة ملبورن السيمانة الفايتة.

ونهار الإثنين اللي فات رفع دجوكوفيتش دعوى قضائية، فالوقت اللي هو مزال حاصل فمركز خاص باحتجاز المهاجرين وسط مطار ملبورن.

وتسببات هاد القضية فصداع كبير لا فأستراليا ولا فجميع أنحاء العالم. شي مع وشي ضد، ولو أن الغالبية بان ليهم بللي اللعاب الصربي كيقلب على تعامل استثنائي معاه من دون كَاع الناس.

وأكثر من هادشي وصلات القضية لأزمة دبلوماسية بين صربيا و أستراليا، فاش اتاهم الرئيس الصربي، ألكسندر فوتشيتش، الأستراليين بللي “تعاملو خايب بزاف مع البطل”.

وقال المحامون أن نوفاك دجوكوفيتش (34 عام)، اللي كيعارض التلقيح ضد كورونا، خذا “إعفاء طبي” بلا ما يايديرش الفاكسان ويقدر فنفس الوقت يشارك فبطولة أستراليا المفتوحة، وهادشي كعا بزاف دالناس خصوصا منهم المواطنين الأستراليين اللي مفروضة عليهم شروط وقيود وقائية صارمة لمواجهة انتشار الوباء مع ظهور المتحور الجديد “أوميكرون”.

والتطور اللي وقع هو منين منعات السلطات الأسترالية، نهار الأربعاء، لاعب التنس الصربي من دخول البلاد بعدما وصل للمطار، وخا كانت عندو ڤيزا.

وقالو مسؤولين من بوليس الحدود فأستراليا بللي دجوكوفيتش “ماقنعهومش وماجابش حتى دليل مناسب”، و الإصابة السابقة بفيروس كورونا ماشي مبرر طبي يسمح ليه يدخل البلاد بلا تلقيح. بحالو بحال كَاع المسافرين.

فهاد الظروف المورال ديال اللعاب طايح وغالبا ما يقدرش يلعب من بعد وخا يكون الحكم النهائي فهاد لافير لصالحو ويخليوه يدخل. غادي يكون صعيب عليه يلعب هاد البطولة طرونكيل من بعد هاد “الفيلم” كلو اللي وقع، كيف قالو بعض المتتبعين ديالو فمواقع التواصل الاجتماعي.

لكن فالمقابل وفآخر الأخبار اللي نقلاتها وسائل إعلام دولية، هاد العشية، فإن نجم التنس الصربي طلب نقله من مركز احتجازه في مطار ملبورن لمكان آخر باش يقدر يتريني و يوجد قبل انطلاق بطولة أستراليا المفتوحة، حسب المحامين ديالو.

ودبا كلشي كايتسنا قرار المحكمة اللي غادي تحسم فقرار الترحيل فجلستها اللخرة نهار الإثنين الجاي.

موضوعات أخرى

28/03/2024 22:35

اشناهي المواد الغذائية الفاسدة اللي تشدات ف15 يوم درمضان؟ 402 طن فيها 106 من التوابل و60 طن من العصير و35 طن من لحليب و34 طن من السكر واتاي

28/03/2024 22:30

لشكر شتت تنسيق المعارضة.. زرب على بنعبد الله وبنكيران وأوزين وعلن رسميا باسم المعارضة على ملتمس الرقابة

28/03/2024 22:00

الأمير هشام العلوي عطا محاضرة فمعهد الدراسات السياسية فباريس على دور السياسة فالتقدم الاقتصادي فمنطقة الشرق الأوسط و دار مقارنة بين الانظمة ديال الخليج و ديال شمال افريقيا

28/03/2024 21:30

ضوسي السمسرة القضائية.. غرفة الجنايات بكومناف حكمات على عصابة ريبكو ليفها قضاة ومحامين وسماسرة بالحبس والغرامة

28/03/2024 21:00

يكذب الإسلامي وهو يتحدث عن تفكك الأسرة في الغرب! نحن روحانيون وأسرنا متماسكة وأطفالنا يكبرون في الشارع بعناية إلهية

28/03/2024 20:30

لاگوارديا سيپيل شدو جهادي صبليوني من أصل مغربي نشر رسائل مشفرة لدعم داعش وشروحات حول كيفية تصنيع المتفجرات

28/03/2024 20:00

الهاكا عطات دروس لـ”مومو” وهيت راديو: خاص احترام نزاهة البرامج وتكون مضامين اعلامية آمنة ويقظة و”المبادئ والقوانين” ماشي ترف