نجوى المالحي -كود//

وزارة النقل والتجهيز كتحط فلوس صحيحة باش دير اشهارات ديال التوعية وحوادث السير المميتة لي كيعرفها المغرب يوميا وشهريا وسنويا تنقص، وفي الأخير الناس لي خاص يعطيو نموذج زوين، كيضربو كولشي في الزيرو.

أسباب نزول هاد الهضرة هو أن عبد العالي لمهر، لي معروف بطاليس حط ستوري في انستگرام فرحان فوق موطور 103 وغادي مكسيري في وهاز معاه صاحبو ومداير لا كاسك لا والو.

كيفاش بغا مول فرقة “ايموراجي” يكون قدوة زوينة للآلاف لي متبعينو في الصفحات ديالو، كيفاش يمكن واحد يضرب فالزيرو الجهد الكبير ديال المؤسسات؟

في الدول المتقدمة كيكون المواطن والفنان مثال زوين للاخرين، عندنا في المغرب بنادم معروف التصرفات ديالو عبارة عن “مود دومبلوا” دشنو مخاصكش دير.