نجوى المالحي-كود//
البارح كثر بزاف ديال القيل والقال على أمال صقر ومسلم بعدما كل واحد دار بوسط على حسابو في انستكَرام كيحشي فيه الهضرة للاخر، والخلاصة الكبيرة ديال هدرتهم هي انهم مخاصم وكاعيين ويمكن حتى غادي يطلقو.
ولكن دويرة خفيفة في الحسابات ديال الكوبل وغادي يبان للناس انهم دايرين “فولو ” لبعضياتهم وأنهم كيلايكيو شي لشي حشيان الهضرة ديال “الزواج والطلاق والشمتة” بلا حتى مشكل.
والخلاصة أن الفيلم كامل دايرينو على قبل شوية ديال البوز.
اما التبركيكة لي جابت “كود” فهي ان مسلم صور هادي تقريبا 15 اليوم فيديو كليب، وناض ليه صداع مع المخرج على ود الفلوس لي تعطل عليه فيهم وجات أمال لبلاصة التورناج وعبرات على الغضب ديالها من شي حاجة دارها راجلها.
هاد تخاصيمة لي كلشي ساق ليها الخبار هوما حاولو يستغلوها لصالحهم ويديرو بيها شي براكة ديال البوز بما انهم غبرو وممسوق ليهم حدهاد الايام.
وهادشي زاد تاكد البارح نيت، بعدما بجوج هدرو على الكولكسيون الجديدة ديال التيشورتات دمسلم “Caballero”.
