عفراء علوي محمدي- كود//

كشف عبد المنعم الرفاعي، دفاع ضحايا فقيه الزميج اللي تحكم ب30 عام دالحبس، على خلفية جناية اغتصاب قاصرات، أنه غيدفع ملف طلب الاستئناف، بحكم أن التعويض اللي تحكم بيه غير كافي لجبر الضرر.

وزاد المحامي، فتصريحو ل”كود”، أن العقوبة السجنية اللي تحكم بيها هي أشد عقوبة، ولكن فالمقابل الدعوة المدنية فشقها المالي خاص يكون فيها تشديد.

وأشار أن العقوبة المالية كتوصل حتى ل2 مليون درهم، والضحايا خداو 60 ألف درهم لكل ضحية، “فيحين حنا كدفاع طالبنا ب200 الف درهم لكل ضحية”، على حساب هضرة الدفاع.

وبالإضافة للجانب المالي، قال الرفاعي أن هيئة الدفاع قدمات طلب باعادة التكييف القانوني للمواد المؤطرة للاتجار فالبشر القابلة للتسبيق.

وكشف المحامي ل”كود” أنه غيوضع طلب الاستئناف للمحكمة بعد غدا الاثنين.