أسماء غربي – كود///

هاد الدرية لي فالصورة، صورتها دارت البوز هاد الاسبوع وبجانب أنها مختطفة منذ أزيد من أسبوع، النشطاء وبعد مرور أيام ناضو كيحيحو على التضامن، كيفاش القصة اجيو نفهموها كلما.

اختطاف

قبل اسبوع تم اختطاف هاد الطفلة لي سميتها اخلاص وفعمرها ثلاث سنوات، وقضيتها كتشبه قضية الطفلة غزل بزاف، ولحدود الساعة مازال ماتلقاتش الدرية، وهادشي خلا الكثيرين يتضامنو مع الطفلة لي كتقول عائلتها أنها زوهرية وخايفين تتذبح من قبل الباحثين عن الكنوز.

العديد من النشطاء فمنطقة الريف طلقوا حملات للبحث عنها، فيما كاين اخرين تضامنوا معها، بينما تداولت وسائل الاعلام أخبار اختطافها، هادشي خلا العديد من النشطاء يتساءلو، علاش إخلاص ماكاينش معاها تضامن كبير لي غايحرك الاجهزة الامنية والمخابراتية باش يجيبوها دغيا، كيف وقع فقضية الطفلة غزل لي تضامن معها الجميع.

وهادشي خلا هاد النشطاء يخرجو بخلاصة أن ما يعتبر بمدن الهامش تا حد ماكايتضامن معها على عكس مدن المركز لي كتلقى كولشي كيتلهط باش يتضامن معها.