نجوى المالحي-كود//

الصحافي صلاح الدين الغماري خرج بفيديو حطو زميلو المتخصص في الاقتصاد المهدي البخاري وهو داير نظاظر كحلين وقال فيه “هلكتونا” ومبقاش قادر يهضر وإلى بغا يهضر غادي يبدا يغوت على بنادم، فاشارة لهادشي اللي واقع ديال جايحة كورونا.

هاد الطريقة، بزاف ديال المغاربة جاتهم عادية، وفهمو انه غير ضاحك، وبغا يبسط مع الجمهور، والبعض انتاقدوها، وكاين لي گاع عبر على الرفض ديالو بصريح العبارة بحال الممثل هاشم البسطاوي لي كتب في ستوري على حسابو في انستكَرام “حتى واحد ما يبقى يغوت علينا.. صلاح الدين الأيوبي ومكانش كيغوت”.

وتم تداول فيديو الغماري في الصفحات ديال مواقع التواصل بشكل كبير، وشي وحدين طلبو منو يبدل هاد الطريقة لي ولا كيدوي بيها وقالو بنادم ماشي كيرضع صبعو باش يبدا يغوت ولا يتفنخ بحالا خدام بجميل، هادو ناس مافهموش الدرجة الثانية في هدرة السيد.. ولكن ماشي مشكل، الريوسا مفرق،  وكولها وحسب ذكاؤو كيفهم الضحك ولا كياخد كولشي جديا ويتعصب ويبدا ينظر ويمنع ويحاسب.

وهو لا عاودنا الفيديو مليون مرة، باين وواضح ان الغماري غير ضاحك، واش ضحك حامض؟ يمكن. ولكن ماغوت على حد، ماحسب في راسو ماوالو.. غير المغاربة عزيز عليهم يشدو فشي واحد.