عمر المزين – كود – مكتب الرباط //
وسائل إعلام مريكانية وحتى إسرائيلية كشفات بأن إسرائيل شرات “الفاكسان” ضد فيروس كورونا من روسيا وقدماتو لحكومة بشار الأسد.
التقارير الإعلامية قدمات تفاصيل مثيرة على أسباب شراء هاد اللقاح لسوريا. فقد كشفت بأن فتاة إسرائيلية دخلات نهار 2 فبراير للأراضي السورية و كانت تتحدث اللغة العربية بطلاقة.. و شدوها السوريين، و وافق من بعد نظام بشار الأسد بفضل وساطة روسية باش يطلق سراحها و ترجع البنت لبلادها اسرائيل.
المثير فهادشي أن سوريا كان ليها شروط و طلبات عدد من الأمور مقابل ترجع هاد البنت لبلادها، بعدما دخلات من منطقة جبل الشيخ بشكل سري، ومن بين هاد المطالب السورية كان طلب أن دولة إسرائيل تخلص عليهم الآلاف من الجرعات ديال الفاكسان الروسي.
وقالت البنت الاسرائيلية ف لونكيط معاها باللي غير بغات تدير مغامرة ودخلات لسوريا بهاديك الطريقة وحيت عزيز عليها تسافر بزاف. هادشي كشفات عليه القناة 12 الإسرائيلية في الوقت اللي قالت فيه صحف إسرائيلية انها دخلات لسوريا باش تلاقا مع شاب تعرفات عليه عن طريق “فايسبوك”.
صحيفة “نيويورك تايمز” بدورها أكدات ان البنت الإسرائيلية مغامرة و فايت ليها شحال من مرة حاولات تدخل لقطاع غزة، والأردن والضفة الغربية، وكان كيتم اعتقالها من طرف الجيش الاسرائيلي لكن هاد المرة قولبات كلشي ودخلات لسوريا بلا ماعاق بيها حتى واحد فالحدود.
اسرائيل دبا خلصات الفاكسان لسوريا ب”الشيكل” و شراتو من عند الحليف الروسي، لنظام بشار الأسد، اللي باع و شرا معاهم.. الصفقة سرية في الأصل لكن كلشي تعرف من بعد.
ورجعت الشابة و المغامرة الإسرائيلية لدارهم نهاية السيمانة الفايتة عبر طائرة روسية.
https://www.nytimes.com/2021/02/20/world/middleeast/israel-syria-prisoner-swap-vaccines.html