الرئيسية > آراء > صراع الرحل و الفلاحين ف سوس الا ماتدخلاتش الدولة غادي يكمل ب” اشتعال البارود من كل جهة”
06/12/2018 16:00 آراء

صراع الرحل و الفلاحين ف سوس الا ماتدخلاتش الدولة غادي يكمل ب” اشتعال البارود من كل جهة”

صراع الرحل و الفلاحين ف سوس الا ماتدخلاتش الدولة غادي يكمل ب” اشتعال البارود من كل جهة”

ع- بن أحمد-كود//

عشت الطفولة ديالي ف قرية لخصاص اللي كانت تابعة لتزنيت وهي منطقة فوق الجبل،تقريبا شي الف متر فوق سطح البحر،يعني الفلاحين كايعانيو من نقص الماء، باش تحفر بير خصك تدوز على كاع الطبقات الجيولوجية و الشتا  اصلا والو ..باح.. ورغم ذلك كانو كايصبرو ويزرعو شوية الزراعات بحال القمح و لا يتسناو اركان و اكناري سنوات باش يعطي شوية د الثمار.. و كنت كل مرة  فوقت معين من العام كنسمع الناس مساكن كايهضرو على هجوم الرحل اللي قريب وكايستعدو ليه، كانت قضية مولفينها وخا مخيفة: جحافل من الجمال و الماعز و الاغنام كتجي  من الجنوب  ف اتجاه الشمال ومعها حراسة من سيارات لاندروفير ديال ناس كايهضرو الحسانية و كلشي كايهضر عليهم بخوف و حذر حيث كما يقال هاد الناس مكيخافوش من الجوندارم..

ومن بعد شفت بعيني،الجمال الكبيرة اللي كتدوز فوق فدان صغير ديال شي فلاح داير فيه شوية د القمح، يعني خمسة ميترو على اربعة، ومقابلو عام كامل و كايجي جمل كايسرط كلشي ف دقيقة او نبات اكناري اللي كايتجمع عليه خمسة الجمال كايلهفوه بالشوك ديالو  ف ربع ساعة، ولا نطفية د الما اللي عمرات بصعوبة ف  ف ثلاث اشهر ديال القحط كايبان ليك السارح كايخويها للجمال بلا خوف ..ويا سلام على منظر تشوف الجمال كيفاش كتشرب داكشي سريع و عجيب، الة شفط ضخمة..المهم كايبانو الفلاحين لاحول ولا قوة لهم من غير انهم  كايتجمعو و كايتفرجو  فهاد المجازر النباتية ولا كايهضرو مع شيخ القبيلة او المقدم وشي مرات كايجي القايد و الجوندارم ولا شيء يقع..مكايقدروش يحميو هاد الفلاحين مساكن.

شي مرات شي ناس و خصوصا الشباب كايطلع ليهم الدم وكيبداو  مواجهات بالحجارة و العصي و كنعقل شي وحدين  كانو سرقو جمل صغير ديال هاد الرحل و دبحوه انتقاما، ولكن هنا تحركو الجوندارم و شدوهم ودوزو ماتيسر من الحبس ف سجن انزكان اللي كان اكبر كابوس كايخوف ناس المنطقة.

باش يفهمو الناس ديك الساعة علاش المخزن اللي مكيخاف من حد،ولا كايخاف  من هاد الرحل ذي السحنات السمراء و يحمي هاد الهجومات عليهم و ضربهم و الاعتداء على زراعاتهم كانو كايقلبو على تفسيرات ومن بينها  ان هاد الرحل ،المخزن كايحميوهم حيث  هما صحراويين فقط  و القضية فيها ابتزاز بقضية الصحراء.. ولكن حسب ما سمعت  و العهدة على الاشاعات و لعن الله من ينشرها ،ان اغلب قطعان المواشي و الاف الجمال كتكون ديال شي حد نافذ  من اعيان المدن الصحراوية وربما جنرال او كولونيل و ان الناس اللي كايبانو ليك كايسرحو و لابسين مدني ماهم الا عساكر بلانتوات..ولكن كتبقا هاد القضية اشاعة و باينة كذب، تفسيرات غير منطقية كما قلنا، لايعقل ضابط  القوات الملكية  المسلحة يخلي خدمتو ف التسعينات و القضية مرونة ديك الساعة و الحرب مع البوليساريو و يقابل مشروع تربية الجمال اللي معروفة ديال من بعلامة كي على عنقها  و من الفوق يجبد الصداع مع السكان ف سوس كلها..

العجيب انه بعد كل هاد السنوات،تختارعات الانترنيت و التيلفون و الماء دخل لخصاص ومابقاش كايجي من كاميو سيترنات من مناطق اخرى  وولا فيها الروبيني و لخصاص براسها ولات تابعة لسيدي افني وولات مدينة ومابقاش فيها قهاوي الشوا  والريع ف الصحراء مابقاش ومايسمى اشبال الحسن الثاني مابقاوش موظفين اشباح و داز العهد الجديد و الدستور الجديد ومزال نفس المشكل….ثلاثين عام دابا و مزال كل عام جحافل الرحل كتدوز على سوس، من لخصاص اللي مافيها لا نباتات من غير الدغموس و اكناري الى شتوكة ايت باها اللي عامرة فيرمات وكتغذي اوروبا بالطماطم و البنان و غيرهم. ودابا ولات كاع  هاد اعتداءات الرحل و المواجهات ديالهم مع الفلاحين موثقة بالفيديو، و هادشي اخطر و كايغذي الصراعات القبلية القديمة وغادي ينوض روينة كبيرة مع الوقت..

و الخطير ان الادارة ديال السلطة المحلية و الدرك الملكي و غيرهم،مزال كتعامل مع سكان هاد المنطقة انهم دراوش وكايصبرو وماغاديش يديرو ردود فعل، في حين ان تاريخ المنطقة راه عامر  ثورات و تمردات لادنى سبب، شوف شنو قال المؤرخ الاكراري ف كتابه روضة الافنان:

“ما إن علم الناس بوفاة السلطان ( الحسن الأول) حتى قام أهل سوس من وادي سوس إلى وادي ماسة على ساق واحدة ليمحوا ما فيه رائحة المخزن وحاصروا من تحصن منهم في تيزنيت،وهدموا ديار القياد بهشتوكة وهوارة و رأس وادي سوس و اشتعل البارود من كل جهة.”

مزال الدولة مكتفعلش قوانينها  اللي واضحة تجاه شكايات هاد الفلاحين لدرجة انهم دارو تنسيقية “اكال” ودارو مسيرة و حوارات مع وزراء بل ان الحركة الامازيغية تبنات هاد الملف و وخا بان لي  شخصيا صادم ان سي عصيد اللي زعما وجه من وجوه الفكر و الحداثة ومابعد الحداثة كاع  و اللدي منو.. خرج بتصريح فيه شوية د التنصيفات العرقية حيث الرحل ف اعتقاده زعما عرب، رغم ان نفس الشخص و نفس الحركة الامازيغية كتقول الصحراويين امازيغ براسهم،و اصلا لايجوز تأويل هاد الحوادث بشكل عرقي..اشهر الرحل ف العالم راه امازيغ وهم الطوارق..زيادة على تلميح سي عصيد بان ناس سوس عندهم الحق يديرو شرع يديهم وهو نفس عصيد زعما اللي كايظل يهضر على الحضارة و المؤسسات و القوانين الوضعية و احترامها الخ الخ..ف اقل مواجهة مدنية خرج منو البدوي اوتامزيرت الذي يؤمن بسلطة الحجر و الجباد..

تاريخيا الصراع بين الرحل  الرعاة و المستقرين الفلاحين ديما كاين، ماعمرهم يتفاهمو  حيث فعقلية الرحل فجميع مناطق العالم ماكايناش شي حاجة سمتها الملكية الفردية او ارتباط بالارض وهادي ديالك وهادي ديالي، كلشي ديال الله.. وهادشي انتج حضارات و حروب، غزو العرب لبلدان اخرى  مجاروة ليهم راه صراع رحل ضد فلاحين و قبل منها الوندال مع الرومان و التتار  و المغول الرحل ضد الحضارات د العالم القديم كلو..ولكن كايبان ف هاد 2018 صراع الرحل- فلاحين  ف منطقة سوس ماغادي يحيب للمغرب غير شي روينة اخرى بلا فايدة..شي ” اشتعال البارود من كل جهة ” و بالتالي  راه  الحل ساهل، القوانين موجودة و خص كل واحد يدير خدمتو، السلطات المحلية  و الجوندارم و عناصر مندوبية الغابات ف  هاد المناطق  خصها تدير شغلها ومابتقاش تدير عين ميكة بدعوى تعليمات ولا هادا صحراوي ولا هادا غير شلح..خصها تدير واجبها  و تاخذ الشكايات بمحمل الجد و تفعلها و تحمي الناس و والزراعات ديالهم، وتحمي حتى الرحل الا بغاو يسرحو بالبهايم ديالهم  ف المناطق اللي مافيهاش الزراعات و الدواوار  بكل بساطة و السلام عليكم.

موضوعات أخرى

28/03/2024 11:00

إدانة المحاميين د الرابور “ديدي” مداهمة الفيديراليون : زادو فيه وهذا” فخ”

28/03/2024 10:30

وشوفو التلاميذ كيولاو.. تلميذ شرمل إداري بثانوية فسلا وشرك ليه وجهو وباقي داخل خارج للمدرسة وغليان وسط أسرة التعليم فالمدينة

28/03/2024 10:20

أزمة كليات الطب والصيدلة مزال غادية.. مجلس طلبة الطب بفاس: النضال ديالنا مستمر ومقاطعتنا المفتوحة قائمة

28/03/2024 10:00

تمويل مول “الشروق”. بوصوف باغي يخلع القضاء بالرسالة الملكية: غير خرج خبار التحقيق معاه نشر رسالة للملك فالفايسبوك وسبونوسوريزياها

28/03/2024 09:00

محكمة فالصبليون برأت المتهمين فقضية لكسيدة اللي ماتو فيها 8 ديال المغاربة ف اسبانيا عام 2008

28/03/2024 07:00

سمية الخشاب دخلات طول وعرض فبرنامج الكاميرا الخافية ديال رامز جلال: هادي جريمة كيعاقب عليها القانون