كود هناء ابو علي ////

الملكية اهم مؤسسة فهاد البلاد. كلشي مفاهم على هاد الشي او نقولو الغالبية العظمى العظمى باش ما يتقلقوش هادوك اليسار الجذري وبقاياه فشي احزاب وشي اسلاميين. نهار مرض الملك ودار عملية جراحية على القلب كاع ففرنسا كان بيان واضح شرح كلشي. من بعد جا رئيس الحكومة وقال باللي وقع اتصال مع رئيس الدولة وصحتو مزيان.

هنا كان التواصل مزيان. سدو الباب على اشاعات كثيرة كثيرة كتروج. لكن اللي وقع من بعد ان الملك تلاقاوه الناس فگالري لافاييت بباريس وتصورو معاه. هنا كانت الامور تكون مزيانة بزاف الى كان هاد الشي عادي ولكن باش كيخرجو هاداك سفيان بحري اللي عندو صفحة وكيولي ناطق بشي حاجة كبيرة عليه بزاف كتولي مشكلة.

المشكلة تزادت البارح مع اشاعات هنا وهناك. اشاعات تخص الملك. باش هاد الاشاعات اللي ظهرات فاوربا وحسب ما علمته “كود” وصلات حتى لقنوات تلفزيونية فرنسية. طبيعي ان حكام الجزائر وناس البوليساريو يسوقو لهاد الشي لان همهم يزعزعو المغرب. لكن اللي ماشي معقول انه فهاد اللحظة يبقى هاداك بحري هو الوسيلة الوحيدة للتواصل. هادي مؤسسة كيف قلنا مركزية محورية فحياة كل مغربي خاص التواصل يكون بطريقة اخرى الا هاد خينا.

الغريب انه حتى الجعايدي الحارس الخاص للملك دار صورة للملك مع مغاربة فباريس. هاد الشي ما خدامش.

خاص تواصل اخر ماشي بالضرورة بيان. ممكن تكون صورة ولكن ماشي بحري اللي يسوقها. واش اعباد الله كاين قنوات عمومية وكاين اعلام بكاع انواعو وشي وحدين شادين لي فهاداك بحري.

ممكن يكون اتصال هاتفي ممكن يكون خبار ممكن تكون صورة ماشي رسمية بزاف ولكن عندها معنى. لمغاربة كيبغيو ملكهم بزاف. ماشي كملك فقط بل كانسان كذلك. الاشاعة باش تنتاشر خاصة فدول اوربية كتلف كاع لمغاربة حقاش كتوصل بسرعة. هاد الشي علاش شي قضايا ماشي اي نكرة يدير ليهم التواصل