كود كازا//

على عكس التوقعات اللي دارت مديرية الأرصاد الجوية، واللي تنبآت أن جهة كازا سطات والسواحل الغربية عامة غتعرف متوسط تساقطات بين 50 وسبعين ملم فهذ الثلاث أيام اللي كيعرف المغرب تقلبات جوية حادة، لبارح الخميس فاتت كازا والمجمدية سقف 100 ملم غير فظرف 24 ساعة.

والمحمدية جات هي اللولة من ناحية التساقطات المطرية، حسب النشرة الجوية ديال المديرية اليوم الجمعة، بحيث سجلات 107 ملم، تابعاها مازا اللي غرقات هذ الأيام بالشتا والفيضانات ب100 ملم.

وكتجي فالمرتبة الثالثة الرباط سلا ب68 ملم، والرباط المدينة ب47 ملم، وتيط مليل ب41 ملم.

وكانت قبل توقعات المديرية توصل التساقطات المطرية لمعدل 130 ملم فالساعة فالشمال كلو تقريبا وآسفي وتارودانت.

وفتوقعاتها ل24 ساعة الجاية، فماعلناتش على نشرة إنذارية بالأحمر كيف قبل، بل حصرات مستوى الخطر فالبرتقالي، وحددات أعلى التساقطات فكل من اكادير إداوتانان والسواحل الشمالية من 40 حتى ل70 ملم.