كود الدوحة ///

دابا نايضة الروينة على التيكي فماتش المغرب غدا ضد الصبليون فثمن نهاية كأس العالم اللي غادي يكون مع الستة فسطاد المدينة التعليمية.

القضية دابا ماشي على شكون غادي ياخد هاديك 5 الاف تيكي اللي قالت الجامعة باللي خداتها من الفيفا. شي كيقول غادية تباع وشي كيقول غادي توزع. ننساو هادي.

فهاد المونديال كاين جوجت الانواع من الصحافيين المغاربة. كاين صحافيين معتمدين من الفيفا هادو كياخدو تذاكر كصحافيين بعد ما كيطلبوها من بلات فورم ديال الاعلام فموقع الفيفا.

كاينة عينة اخرى من الصحافيين المغاربة اللي حاضرين للمونديال. هادو خداو اعتماد من الدولة المستضيفة فقطر وكيكونو غير فالمركز الاعلامي اللي كاين فمشيرب وسط الدوحة. هادو ما عمر الجامعة لا سولات فيهم ولا عطاتهم شي تدكرة للدخول وماشي ضروري درجة اولى او 2 او حتى 3. شفنا وحدين جاو من الرباط وخداو تذاكر ليهم ولعائلاتهم والجامعة ما عمرها سولات فهادو

ايلى دخل شي حد خاصو يتصال ويعاورط ويسول ويقدر ياخد او للا. كون كانت التذاكر كتباع كون شراتها المؤسسات.

تصورو مؤسسات اعلامية راسلة صحافيين وصحافيات على حسابها فقطر اللي كلها غلى وكتقاتل وفاللخر ما كيلقاش صحافي ديالها تذكرة. كاينين صحافيين كيخدمو بزاف وكثر من هادوك المعتمدين اللي وزعات عليهم الجامعة الف اورو وماشي غير كيطبلو بحال راديو مارس اللي ساكنين فنفس اوطيل الجامعة.

هاد الصحافيين ما سكنوش فالمراكز الاعلامية كيف دارو شي صحافيين معتمدين. عاطينها غير طحين الكاغيط.

دابا هاد الناس اللي كيفرقو التذاكر فالجامعة ما كيحشموش.

اما قضية الڤي آي پي فراها فضيحة كبيرة بزاف. القضية غادية نعاودوها فكود ولكن حتى يلعب الاسود غدا فماتشهم ضد الصلبيون واللي بغيناه يكون فصالحنا