كود الرباط ///
ول البارح لخميس 28 يوليوز 2022 بالمركب الرياضي مولاي عبد الله بالرباط ففضاء “ڤي آي پي” “أ”٬ كان من بين اللي معروضين داخلين يشوفو فينال كاس العرش بين الوداد البيضاوي والنهضة البركانية 4 الشباب.
فاللول گلسو جات عندهم واحد السيدة كانت باسلة من البروطوكول فالجامعة الملكية المغربية لكرة القدم دارو فيها. هنا تصرفو تصرف مقبول. لكن شوية واحد فيهم جبد سيگار سليم وبدا يكمي. اييه بدا يكمي وسط السطاد اللي اصلا التدخين ممنوع فيه.
هما كانو 4 لبسهم كيبين باللي عائلاتهم عندهم اللعاقة. غاديين يقولها. واحد فيهم لشي حد باللي من المعهد العالي للقضاء اي غاديين يكونو قضاة. هنا المشكلة لكبيرة.
مع الوقت بقى صاحبنا كيمكي وتزاد واحد اخر وما مادينهاش فالعالم. من بعد واحد فيهم كان مريض بحب الظهور كيزريط بطريقة غريبة٬ ناض من بلاصتو والناس تفرج وتكى علي الحيط حتى ضرگ واحد السيد وقالها ليه. هادا شرب الما ولاحو من فمو ولاح القرعة فالارض باش ضاعت شي اوكازيون للحمرا.
واش هادا طيش شبابي؟ موحالش. ماشي براهش هادو. هادو غاديين يكونو قضاة غدا. كيخلع ايلى بحالهم وصلو للقضاء وولاو يحكمو. انفعاليين بطريقة غريبة. عزيز عليهم راسهم. حاسين براسهم فوق الكل.
باش كتشوف عبد النباوي والداكي وفارس وعدد كبير من القضاة والقاضيات كيفاش فيهم لحيا والوقار والادب٬ كتصدم من تصرفات هادو. قبل ما يتعلمو٬ خاصهم يتأدبو. راهم خطر علي القضاء وعلى المجتمع هادو.
طبعا ما كنديروش التعميم ولكن طلبة مؤسسات اخرى كيحشمو على هاد العينة اللي ممكن تكون شادة ولكن كانت فماتش رسمي وتصرفات قدام كلشي تصرفات غير مسؤولة وغبية
