عفراء علوي محمدي- كود//

مهنيون فمحطة الكيران “ولاد زيان” دارو اليوم وقفة احتجاجية، قدام المحطة فكازا، احتجاجا على السدان ديالها لأشهر طويلة، فهذ الحجر الصحي اللي عارفاه المدينة بسباب فيروس كورونا المستجد، وبسباب إغلاق المدينة وفسح المجال للتنقل منها وليها بالرخصة الاستثنائية.

وفاحتجاجهم اليوم، طالبو المهنيين، اللي كينتميو ل4 هيئات رئيسية اللي هي المركزية النقابية للاتحاد العام للشغالين، والجامعة المغربية لمقاولات النقل الطرقي، والنقابة الوطنية للنقل والمسافرين، واللجان العمالية المغربية اللي كتمثل السائقين، بإعادة فتح المحطة، بحكم أن إغلاقها خلاهم يتكبدو خسائر مادية كبيرة، وتسبب هذشي فتشريد عائلاتهم.

عبد العالي خفي، الكاتب الوطني لقطاع النقل الطرقي، كان من المشاركين فالوقفة، وقال فتصريحو ل”كود” أن الحضور كان مشرف، بحيث جاو عدد كبير من اليد العاملة، والمستثمرين ديال مقاولات النقل.

وقال أنه إلى بغينا نحدو من انتشار الوباء، خاص فتح المحطة، وتفعيل دفتر التحملات الصحي اللي كان، اللي فيه مجموعة من الشروط ديال قياس درجة حرارة المسافرين والتعقيم، “ماشي شركات الكيران اللي عندها ليزاجونس ديالها خدامين وأنماط النقل الأخرى بجميع أنواعها، وحنا ولينا على حافة الانهيار”، على حساب هضرتو.

وفسؤال “كود” خفي على كيفاش ممكن المحطة تحل والكيران يخدمو وكازا مسدودة، قال: “كازا إلى تسدات كيخص تتسد على الجميع، ماشي شي خدام وشي مابقى ليه والو على الإفلاس”.

وأكد خفي أن هذ الإغلاق خاطئ، حيث تم تعليمات فقط ودون قرار، والحافلات ولام كيضطرو يشارجيو فالزناقي وكيعيشو الرعب مع البوليس، وكيعمرو محاضر إلى تشدو هوما والمسافرين اللي كيتعكلو مصالحهم.