الرئيسية > آراء > شوهتنا العالمية مع قتل 23 مهاجر عندنا. بيان سفيرتنا فمدريد غبي وبيانات الاحزاب شوهة وغياب نقاش وطني على الموضوع كيخلع
30/06/2022 11:00 آراء

شوهتنا العالمية مع قتل 23 مهاجر عندنا. بيان سفيرتنا فمدريد غبي وبيانات الاحزاب شوهة وغياب نقاش وطني على الموضوع كيخلع

شوهتنا العالمية مع قتل 23 مهاجر عندنا. بيان سفيرتنا فمدريد غبي وبيانات الاحزاب شوهة وغياب نقاش وطني على الموضوع كيخلع

كود هناء ابو علي ////

اسبوع تقريبا داز على فاجعة مليلية. حراگة عياو قررو ليلة الخميس الجمعة يقتاحمو داك السياج الحديدي اللي دارتو الصبليون فما تعتبرو حدودها مع المغرب. غير بزاف من هاد الحراگة قصدو المركز الحدودي. هنا وقع اللي وقع ومات لحد الان 23 مهاجر غير شرعي. 

فاجعة وما بعدها فاجعة. شوهة لبلادنا. اش دخلو. باش وقع هاد الهجوم كانت قواتو العمومية ترجع للاور او دخل بطريقة ما يطيحوش فيها قتلى. لحد الان مازال ما دارش شي تحقيق باش تعرفو اسباب وفاة هاد الناس. واش بالاختناق ولا تعرضو للضرب ولا ولا ولا.

الموضوع داز عندنا بشكل عادي. بشكل كيخليك تخلع. كيفاش فاجعة بحال هادي ما حركات فينا والو. كنعتارفو باللي ف”كود” كنا مقصرين بزاف فهاد الموضوع. يستحق تمشي فرقة تماك ودير ربورطاجات ودير خدمة من المنطقة. لكن غاب النقاش سياسي او مجتمعي باستناء بيانات كتزيد فحيرتك.

كان سؤال فالبرلمان باش يعرفو اش وقع. بارد بزاف. كانت تصريحات احزاب فالحكومة والمعارضة مشات بطريقة تعتابروها مستفزة٬ فاتهام الاخر. باللي المغرب مستهدف. 

بالخوشيبات. راه مات 23 شخص عندنا فمنطقة محسوبة علينا وكاين فيديوات لرجال القوات العمومية كيضربو هاد المهاجرين وهما مشبحين فالارض. لنفرض ان شي دولة ما بحال الجزائر رسلات لينا هادو. راه المشكلة فينا. اولا فين اجهزتنا باش تجيب لخبارات عليهم وتوجد استراتيجية لاحتمال مواجهات او اقتحام. ثانيا ها هما عندنا. ماتو عندنا. تقتلو عندنا. علاش نحملو مسؤولية فالمقام اللول للاخر. 

هاد النقاش منوض جدل كبير بزاف فاسبانيا. كلشي كيضرب فينا وكيضرب فالحكومة اللي عتابروها مدعمة لدولة ديكتاتورية بحالنا. اييه كيسميونا كثر من ديكتاتورية. من قنوات اليسار الى قنوات اليمين ودوزو على ديال الحكومة. اذاعاتهم واعلامهم المكتوب والرقمي كيخبط فينا. 

راه الجواب اللي دارتو سفيرة المغرب فمدريد كريمة بنعيش وفرقاتو بخصوص اتهام الجزائر تصرف غبي. راه دم هادوك اللي ماتو مازال ما بردش. 

المقبول فهاد اللحظات الصعيبة هو دولتنا تعطي اجوبة واضحة. اجوبة كتعكس موقفنا من الهجرة. اللي دارتو الدولة هاد السنوات فميدان الهجرة. كانت الحكومة تعلن قبل من كلشي على لجنة وترسلها لمليلية ودير تحقيق. هادي تعطي مصداقية كبيرة فافريقيا وفالعالم. اما صورة دفن الجثث بلا ما تحدد هويات هاد الناس وبلا يوتوبسي راه زاد شوهتنا. 

بلادنا دارت كثر من جهدها فالهجرة. بزز منها ولات دولة استقبال للمهاجرين بعد ما كانت غير دولة عبور. هادوك الصبليون اللي كيسبو فينا صباح وعشية راه المغرب اللي خدام ليكم جدرامي. واخا الرباط ديما كتكرر باللي ماشي دركي اوربا او اسبانيا ولكن الحقيقة راه بصاح حنا جدارمية اوربا. بانت فهاد الفاجعة. لبسنا قضية خايبة دوليا وغادية ضربنا افريقيا بزاف باش نحميو حدود دولة اوربية. حدود ما معتارفينش بيها. 

دابا ممكن الدولة تغير استراتيجيتها. قرار المجلس الوطني لحقوق الانسان فتح تحقيق بوحدو ماشي كافي. خاص قرارات اكثر. دفاعا عن لبلاد وعلى صورتو ممكن للحكومة ضحي بشي مسؤولين. كتوقع فاعتد الديموقراطيات. اش فيها ايلى دارت شي حاجة فهاد الاتجاه. المهم المغرب يبان دولة تحترم الرجل الافريقي. تحترم ادمية الحراگ. هاد الشي خاصو يكون اليوم قبل من الغد

موضوعات أخرى

28/03/2024 10:30

وشوفو التلاميذ كيولاو.. تلميذ شرمل إداري بثانوية فسلا وشرك ليه وجهو وباقي داخل خارج للمدرسة وغليان وسط أسرة التعليم فالمدينة

28/03/2024 10:20

أزمة كليات الطب والصيدلة مزال غادية.. مجلس طلبة الطب بفاس: النضال ديالنا مستمر ومقاطعتنا المفتوحة قائمة

28/03/2024 10:00

تمويل مول “الشروق”. بوصوف باغي يخلع القضاء بالرسالة الملكية: غير خرج خبار التحقيق معاه نشر رسالة للملك فالفايسبوك وسبونوسوريزياها

28/03/2024 09:00

محكمة فالصبليون برأت المتهمين فقضية لكسيدة اللي ماتو فيها 8 ديال المغاربة ف اسبانيا عام 2008

28/03/2024 07:00

سمية الخشاب دخلات طول وعرض فبرنامج الكاميرا الخافية ديال رامز جلال: هادي جريمة كيعاقب عليها القانون