كود مصطفى الشاذلي ///

شوهة كبيرة داروها الصحافيين المعتمدين لتغطية “الكان” فماتش المغرب ضد ناميبيا نهار السبت اللي فات. هاد الشوهة جات فتقرير داروه المكلفين بتوزيع بادجات الماتش علي الصحافيين. تقرير كحل تحدث على فوضى كبيرة وعلى سلوك بعض الاعلاميين.

التقرير كان مقود بصاح وشوه صورة هاد الوفد. التقرير وفق مصدر من الكاف ل”كود” فيه ان الفوضى كانت كبيرة. فالتقرير ان شي حد وما ذكروهش بالاسم قدم راسو رئيسا للوفد وخدا البادجات باش يوزعهم. وفيه ان صحافي اخر مازال كيقلبو عليه دفع زينب المغربية اللي خدامة متعاونة ف”فرانس 24″ واللي خدامة مع “الكاف” فهاد الدورة فقسم الاعلام..

التقرير اللي ما ذكروش ان المكلفين بتوزيع البادجات دارو خطأ كبير وهما اللي سمحو بحدوث الفوضى وهما اللي تسببو فهاد الشوهة.

اللي وقع ان ناس الكاف فداك الماتش مسؤولين علي كل ما وقع.

وفق مصدر “كود” فان هاد اللجنة اللي عقداش اجتماعها العادي في اليوم الموالي للماتش كانت غادية دير بيان وتاخد اجراءات غير هو الملف تطوى تشرح مصادر “كود”. يمكن حسو باللي الخطأ خطأهم. اخبار تحدثت ل”كود” عن وجود اربع شهادات على تلك الاحداث دارت فالتقرير.

الملاحظة ان هناك وفد كبير من المغاربة. واش كلهم عندهم البطاقة المهنية ديال المجلس الوطني للصحافة ولا اللا هادي مشكلة الكاف حقاش هي اللي فتحات الاعتماد وعطاتو. دابا هي اللي خاصها تحل المشكل..

كاين اللي حاضر وما عندوش حتى منبر صحافي وكاين اللي ما عندوش بطاقة الصحافة. عادي توقع الفوضى واللي غادية تحسب على المغرب. عادي يكونو شي وحدين هما معتارفين باللي ما خاصش يكون عندهم الاعتماد وتلقاهم مضاربين على البادج.