محمد سقراط – كود//
شهرين ديال المقاطعة والمغاربة باقي ماعاقوش براسهم تقولبوا، وعوض ماتكون المقاطعة في صالح الشعب، صدق الشعب غير مسخر لشركات معينة بلا مايعيق، الشعب لي كان على الأقل كيشرب الحليب مقاد شوية قبل المقاطعة وللى كيشرب غير الغبرة وبنفس الثمن، الشعب لي قاطع المازوط غير ديال شركة وحدة باش ينقصو ليه الثمن، وللى كيشري المازوط بثمن زايد من شركات خرى، وولات شركات خرى رابحة على ظهر المقاطعة الغاراق ديال الفلوس، الشعب لي وهموه ونصبوا عليه بأنه إلى قاطع غير شركة وحدة غادي يخافو الشركات لخرى وينقصو الثمن، وطبعا هادشي مكانش والشركات لخرى رتافعات المبيعات ديالها وربحات الفلوس على ظهر حسن نية الشعب.
واش باقي ماعاق الشعب براسو بلي هو طلع فهاد القضية غير مسخر لمصالح الناس لي ريطوه وقنعوه بهاد المقاطعة لي معندها معنى ومعندها نتيجة من غير أنها تقدر تسبب فرحيل شركة باش تجي شركة وحدة خرى وتلقى الأرض مفرشة ليها تدخل للسوق بلا ماتظطر تنافس بل غير تدخل وتغطي بلاصة الشركة لي قبلها، راه كنظن لأول مرة كتوقع شي مقاطعة فاشلة بحال هادي فالعالم، مقاطعة دامت شهرين بلا متخلي الشركات ترضخ بل ضرات شركات دون أخرى وصافي، ودابا كيستغلوها الداعشيين باش يوجهوا الناس يقاطعو موازين لي مهرجان كيصرف على راسو، وكينشط السياحة وكيروج على الرباط والسلا وكيفوج على كاع المغاربة، بغاو دابا يقاطعوه من بعد ماحاولو قبل سنوات ومكانوش كينجحو ودابا بغاو يركبو على المقاطعة لي براسها مانجحاتش باش يقاطعو أحد أجمل الأشياء القليلة لي كتوقع فهاد البلاد.
الشعب مسكين باقي في كل مناسبة كيبان أنه نية ديال الله، وقابل للإستغلال والإستخدام وهادي عقود وهوما كيستغلوه ومابغاش يفيق، وحتى نهار قال مع راسو أن سيد نفسه وقراره وقرر أنه يقاطع بطريقة حضارية صدقات المقاطعة مسخرة من عند ناس معينين لأهدافهم ومصالحهم الشخصية، والشعب بحال ديما مجرد أداة كيسخروها لخدمتهم، نهار يحتاجوه فالإنتخابات كيصوت عليهم باش يعطيهم شرعية لممارسة الفساد والتحكم، ونهار يحتاجوه فشي مسيرة راه كيجمعوه ويحطوه فالشارع ويحفظوه الشعارات لي بغاو، غير هو هاد المرة الشعب كان مكرفص وواصلة فيه للعظم وانخرط طواعية فهاد المقاطعة لي للحد الآن ماعطات حتى شي نتيجة ومانقصات ثمن حتى حاجة، عالله يضرب الشعب الفقد فراسو ويعيق بلي مقاطعة موازين ماغادا تخدم مصلاحتو فوالو بل غير غادا تنجح دعوات الظلاميين لي سنوات هادي وهوما مقولبينو.
