محمد سقراط-كود///
الحرب ديال أوكرانيا التعاطي ديال العالم معاها بواحد التحيز مبالغ فيه، بالإظافة إلى الأثر الإقتصادي المباشر ديالها على حياتنا، هاد الغلاء الغير مبرر في أي حاجة ولي كولشي كينسبوه للحرب في أوكرانيا، قزبر ومعدنوس كيتزرع غير في بوخرارو لي دايز جنب المدينة وحتى هو وصل تلاتة دراهم للربطة بسباب الحرب في أوكرانيا، وفي الوقت لي المرتزقة والأجانب باش يحاربو في سوريا والعراق وافريقيا كان خاص يمشيو سالتين في هاد الحرب كيمشيو بالعلالي بخبار الدول ديالهم وداكشي كيتم التسويق ديالو كفعل بطولي أنك تمشي تحارب في حرب معندك فيها حتى علاقة بحال أغلب الحروب ديال الإنسان طبعا، وحتى المغرب طاح في نفس هاد التمييز وهاد التغطية لي تدارت لإعتقال الطالب براهيم سعدون كاع ممديورة حاليا لدواعش وأسرهم وأطفالهم مغاربة راهم في المعتقلات باغين يجيو ويجيبو معاهم العقلية الإرهابية لي خلاتهم يمشيو لتما أصلا.
شنو الفرق بين مغربي مشا يحرب في سوريا مع النصرة أو داعش أو حتى الميليشيات الموالية للنظام والفرق بين واحد مشا يحارب في أوكرانيا مع أي طرف، مكاين حتى شي فرق في الواقع الحرب كتعني قتل الآخر لي كيولي العدو وفي حالة واحد مغربي في أوكرانيا كيفاش حتى وللى جيش تحرير شي دوار في اقليم دونيتسك عدو لشاب مغربي مشا يقرى تما، من غير التحليل لي دارو وقالو أنهم لقاو معتل نفسيا وهادي حالة بزاف من لي مشاو لداعش والنصرة، الفرق هو هاداك سميو طالب وهادوك لخريين سماوهم صحاب خودنجال والكرارص دصوصيط واخا راه مشاو القاريين طبعا بحال أي بؤرة نزاع، ولكن تاواحد منهم ماناضت الأسرة ديالهم دارت مؤتمر صحفي وكتطلب الدولة تتدخل لدى لواء الفاطميون يطلقوا ليها ولدها أو لدى النصرة أو داعش، هادوك إرهابيين كيقتلوا ويذبحوا ويصوروا ويحطو داكشي في اليوتوب بكل فخر، بينما في أوكرانيا هادي دولة كتحارب ضد عدوان أجنبي ولكن بهاد المنطق حتى دونيتسك راه كيحارب من أجل الحرية والإستقلال حسب ماكيدعي الإنفصاليين راه حتى هي حرب مشروعة.
السيد خارج في فيديو وكيقول أنه عاش كيف بغا ودار داكشي لي مقتانع بيه، هادي راه حلم نصف سكان الأرض أنهم يعيشو كيف بغاو ويديرو داكشي لي مقتانعين بيه، ولكن بالنسبة لينا حنا خاص نبقاو نغوتوا وافين بوريطة وافين الدولة وفاين رئيس الحكومة وخاصهم يخرجوه خاصهم يطلقوه، السيد مشدود مسلح في منطقة نزاع كيحارب كان في الصفوف الأمامية كاع، آش كان كيدير تما كيشوي الكبال راه كان كيحارب بحالو بحال واحد آخر مرتزق في داعش أو النصرة أو القاعدة أو حتى في حرب بين دول كيبقى المرتزق مرتزق معندو علاقة بالجندي لي كيدافع على بلادو إلا في حالة كانت عندو الجنسية كما يدعي باه داك الساعة هاديك مشكلة اوكرانيا ماشي مشكلة المغرب لأنه تشد كيحارب دفاعا على أوكرانيا ماشي كيحارب دفاعا على حمرية.
