كود هناء ابو علي ////

محسن الجزولي اللي عينو الملك محمد السادس وزيرا منتدبا لوزير الشؤون الخارجية والتعاون الدولي، مكلفا بالتعاون الإفريقي ماشي غريب عليه الملفات ديال العلاقات الافريقية المغربية. السيد تقنوقراط مائة فالمائة وما عندو علاقة لا بالسياسة ولا بريحتها.

السيد قبل اشهر خدا مارشي كبير فوزارة الخارجية والتعاون. كان هو للي تكلف باعداد تقرير حول زيارات الملك محمد السادس الى الدول الافريقية والاتفاقيات الموقعة وفين وصلات واش ناقصها. هاد المشروع خداتو شركتو “فاليانس” ديال الاستشارة وهي شركة مغربية مائة بالمائة. دارها بعد تجربة ف”اورس اند يونگ”.

هاد الرباطي كيعرف ناس الدولة مزيان ويمكن التقرير اللي دارو هو اللي خلاه ياخد هاد المنصب. غير سالى منو وعطاه وهو يتم تعيينو.

الجزولي كان السباب فبداية الازمة بين مريم بنصالح ديال الباطرونا ومولاي حفيظ العلمي وزير الصناعة والتجارة والتكنلوجيا الحديثة مباشرة بعد تعيينه فهاد المنصب. “فاليانس” كان خدم مع وزارة الصناعة والتجارة وباش جا مولاي حفيظ ما بقاش. ناض عطى واحد الخدمة كانت طالباها الوزارة للباطرونا. خدمة تتعلق بالمغرب الصناعي. طبعا الباطرونا زايدات بيها وخرجاتها على اساس انها ديالها ف”ليكونوميست” ايام قبل تقديم المخطط الصناعي اللي وجداتو وزارة مولاي حفيظ امام الملك محمد السادس في الدار البيضاء.

يبدو انه بعد هاد الكعية الامور تصلحات بين الوزير والجزولي بتدخلات الاصدقاء المشتركين ودابا ولات مزيانة.