كود احمد الطيب الرباط ////
فالحكومة اللي غادية تجيبها الانتخابات التشريعية 2021 موحالش نبقاو نلقاو شكون يكون وزير. هاد المهنة غادية تولي مرفوضة. دابا بلا ما نهدرو على السبان اللي تسب بيه رئيس الحكومة من طرف التلاميذ واللي مصيفطهم بسباب الساعة الجديدة. بلا هاد الشي اجيو نشوفو كيفاش تبهدل هاد المنصب.
الدولة لعبات دور كبير فهاد البهدلة. كان خطأ باش بداو. الخطأ كنعيشو تبعاتو اليوم. الخطاب استهدف الوزرا قلل من اهميتهم. المشكلة ما عمرها كانت مرتابطة بالوزرا بل بنظام عام شامل. كلشي عندو جزء من المسؤولية.
قبل هاد الحكومة الغريبة كان استهداف الوزراء. كانت تصفية للحسابات. ما كنتكلمش على النقد ولا على المعارضة السياسية٬ بل على حملات الاستهداف اللي خدمو فيها كلشي. جا حراك الريف والغريب كلشي عندهم فكرة على كيفاش بدا وعلاش وشكون المستهدف فيه. ما تحرك حد وفالاخير جا “الزلزال الملكي” اللي كان خطأ. عاقب وزراء فيهم وحدين كيخدمو بزاف. كيفاش يتم معاقبة محمد حصاد اللي كان فالداخلية وكان بدا خدمة مزيانة فالتعليم. كيفاش يتم التضحية بنبيل بنعبد الله الامين العام لحزب التقدم والاشتراكية من وزارة السكنى والتعمير غير حقاش حزبو قرر يبقى متحالف مع بنكيران. اما ناس الحراك ما عمر احتجاجهم كان على السكنى، كيفاش تتم التضحية بوزير بحال الحسين الوردي اللي كان شاد الصحة. دابا جابو هاد انس الدكالي ضعيف بزاف وكبير عليه القطاع واجيو غدا حيدوه وقولو راه ما فيدوش.
القضية تكررات مع محمد بوسعيد وزير المالية والاقتصاد. تحيد بطريقة مهينة بلا ما يشرحو الاسباب. اخر اجتماع تقلق الملك رئيس الدولة على بنعرفة وباينة الدقة جاياه. علاش يتقلقو عليه وكلشي عارف باللي ما كانش فيدو باش كان فالخارجية وجا فاطار مخطط الانقلاب علي بنكيران الامين العام حينها واللي كان عين لرئاسة الحكومة. عاد اليوم كتكتب هاديك المجلة اللي كلشي عارف شكون كيتحكم فيها “7 سنين على والو” وراه ماشي سبعة سنين على والو راه سنوات كثيرة على والو. ماشي المشكلة فالبي جي دي اللي فعلا ما فيدوش فتدبير الملفات. المشكلة فالديموقراطية. باغيينها بعيوبها ولا اللا. ايلى باغيين العسل الديموقراطي نصبرو لقريص النحل ديال اللي ما فيدهمش.
فنفس الاجتماع خرج كلام خطير ضد مولاي حفيظ العلمي وزير التجارة والصناعة والتكنلوجيات الحديثة. واش هادا من الوزرا اللي كيتحركو ضربوه هاكاك. يالله اكتشفو باللي عندو جنسية مزودجة وباللي دافع كبير. وراه كانت عندو قبل ما يرجع للمغرب وباش كان مقابل البيزنس ديالو علاش جبتوه اصلا. الخدمة دايرة مزيان وباش كيضربوه كتقولو لكل وزير كيتحرك مزيان وكيدير اجتماعات واخا داير عملية ماشي ساهلة: ها للي كيتسناكم.
ماشي بالتقليقة ماشي بهاد الطريقة يمكن تشجع شي وزير يقبل حتى هاد المنصب. كاين امور كثيرة خاصها تبدل. خاصنا نحسمو فامور بشكل رسمي. واش باغيين الديموقراطية ولا اللا. ايلى بغيناها اللي جا الاول يدير حكومة وباش يتقارح الوزرا يتقبل غير اللي فيدو بصاح ماشي اي واحد. يكون تفاهم من الاول علي حكومة بعدد صغير من الوزرا باش يكونو اللي قافزين.
راه اللي اقتارحو عليه وزير مستقبلا والله لا قبل ليكم. علاش يقبل باش يسب الشارع امو وباه ويشوهوه ويبدلو القصر ولا يخرجو عليه خبارات بحضور رئيس الدولة. غادي المغرب يقلب بالريق الناشف على وزير.
ايلى لاحظتو راه تحيد اليوسفي بدون سبب واخا حزبو ربح اول انتخابات فعهد محمد السادس وجا جطو اللي ديالهم ولكن دارو عليه حرب خايبة ومن بعد جا الفاسي عباس بحال انتقام من المغاربة اللي صوتو على الاستقلال ودارو ليه كلشي الحكومة وغيرها ودارو فيه ما بغاو وجا بنكيران فظروف جديدة وقهروه وجا العثماني انتقاما من بنكيران وها حنا شايفين فيلم اخر غريب. اذن المشكلة كيف قلنا فالسابق راه ما عارفينش اش باغيين
