كود احمد الطيب الرباط ///

دابا رئيس الدولة محمد السادس قال فخطاب افتتاح الدورة الخريفية للبرلمان الجمعة اللي فاتت باللي المغرب كيحتاج ل”لوطنيين حقيقين دافعهم الغيرة على مصالح الوطن والمواطنين وهمهم توحيد المغاربة لا تفريقهم فالمغرب يجب أن يكون بلدا للفرص لا بلدا لانتهازيين”.

طبعا القضاء على الانتهازيين اللي كثرو وغاديين ويتمددو فالبلاد وكيقتلو كلشي كيطلب الاهتمام بالكفاءات وكيطلب توفير الظروف الملائمة كيف جا فالخطاب باش الكفاءات الوطنية اللي كتعطي ترجع للبلاد.

الملك قال باللي الوطن محتاج لوطنيين حقيقيين دافعهم الغيرة. دابا بلا ما نهدرو على الانتهازيين اجيو نشوفو شكون اللي فيه شروط رجال الدولة اللي فيهم الغيرة وتسماو وطنيين حقيقيين.

اللي غادية تقدمو “كود” كيلزم غير الموقع. هما كيمثلو شي قطاعات ماشي كلشي. اخترنا غير 10 صافي. الترتيب ماشي مهم فهاد الحالة. رقم 10 ممكن يكون رقم واحد. غير بدينا بالسياسة وسالينا بالفن. نبداو بالسياسة وندوزو للشي لاخر

1 =

بنكيران
اللي كيبان وطني حقيقي هو عبد الاله بنكيران رئيس الحكومة السابق. طيلة ولايته ظل وفيا لشعاره ان الاستقرار فالبلاد يمر اساسا عبر اصلاح سياسي عبر عدالة اجتماعية عبر حرية اكبر. حيدوه ولبلاد خسرات بزافت لحوايج.
حيدوه وشعلات فالبلاد. حيدوه وسالى هاداك البارشوك اللي كان دايرو. حتى باش ناضو شي وحدين كيسبو كان اول سياسي كيجاوبهم. هاد الشي بان فلقاء مع شبيبة حزبو منظم اخيرا. معاه الحياة السياسية كتنتاعش وبلا بيه كتموت

2=

اخنوش
رئيس التجمع الوطني للاحرار من الوطنيين الحقيقيين. اولا دار فلوسو قبل ما يدخل للسياسة ماشي باش دخل عاد راكم الثروة. اكيد غادي يكون خسر باش دخل للسياسة اكثر مما ربح. الملف اللي شدو كيخدمو. استهدفاتو جهات معروفة داخل الدولة ماشي خارجها فقضية المقاطعة. ما كلات والو. باش الملك دار خطاب على دور الفلاحة فالتشغيل ما تسنى حد. بعد 6 ايام من الخطاب جمع كلشي المعنيين فمراكش باش يلقى حل. ديما كيخدم بنفس الطريقة. كلشي كيتجمع باش يلقى حل جماعي. سياسي من لقلال اللي كيعطي للمرأة بلاصة مهمة بزاف بزاف.

3=

الرميد
وزير العدل والحريات القيادي في حزب العدالة والتنمية لاعب دور كبير باش الشوهة ديال بنعرفة ما تكونش كبيرة. مصطفى الرميد لعب ادوار كبيرة باش يبقى حزبو تحت الاضواء ويبقى محافظ علي شعرة معاوية مع اطراف كثيرة فالدولة. الرميد ما كيهدرش بزاف ولكن باش كيهدر كينوض الصداع. حتى فقضية بوعشرين اللي تهم فيها من قبل بوعشرين نفسو انو سرب المحاضر تظلم. السيد الوزير الوحيد اللي كيقول باللي هاد الملف كلشي ساء فيه للقضاء.
الرميد داير واحد ليكيليبر اليوم واخا ما كيديها فيه حد

4=

مولاي حفيظ العلمي
وزير الصناعة والتجارة والتكنلوجيات الحديثة مولاي حفيظ العلمي من مفاجئات حكومة بنكيران السابقة. رجل اعمال عفريت جا للسياسة وبقى خدام فعقلية المقاولة. حرك الامور فهاديك الوزارة. جاب مناصب شغل كثيرة فقطاعات بحال السيارات والطيران… كان ديما كيقول خاصكم تكونو واقعيين فمشروع الوهم اللي باعو الياس العماري رئيس جهة طنجة للمغاربة بخصوص استثمارات خيالية للصين.
فمداخلتو الاخيرة فالجامعة الصيفية للباطرونا عطا القاصح لرجال الاعمال. عارف راسو هدر فوضعية حساسة جدا. غالبية هاد رجال الاعمال ما تايقينش فالاقتصاد الوطني ما بغايين يستثمرو.
بيعتو ل”ساهام” =التأمين= لمليار دولار لشركة جنوب افريقية رجعات الثقة فاقتصاد مغربي كلى لعصا بعد المقاطعة. ما كيقلبش علي طموح سياسي. باغي يخدم وهو مخبي

5=

الحموشي
عبد اللطيف الحموشي من رجالات الدولة اللي بقات الدولة كتعول عليهم حتى خلات مؤسسات كثيرة عاطياها غير للكسل. الحموشي شاد جوج الاجهزة غاية فالحساسية. المخابرات الداخلية وصداعها والامن بمشاكيلو. معاه الدولة ما ضرباتش ما قاصهاش الارهاب هادي مدة. معاه رجع الروح لقطاع حيوي ديال البوليس. ولات الشفافية والنزاهة ومعاه كاينة الفعالية.
يمكن من القطاعات الغاية فالحساسية اللي خدامة فالمغرب اليوم.
الحموشي ماشي كيخدم غير فالداخل. اسلوبو وطريقة عملو خلات دول اجنبية كتطلب الدعم المغربي. استافدات الديبلوماسية بزاف منو. ناجح حقاش عزيزة عليه خدمتو. حقاش مدور بيه ناس كيموتو على خدمتهم. هاد الشي علاش ولات عند البوليس سمعة مزيانة مقارنة بالماضي.

6=

حمدي ولد الرشيد
ولد الرشيد يستحق يكون فخانة رجال الدولة. يمكن من القلائل اللي قادر يواجه الانفصال بقوة. ما كيخافش. بوحدو قدر يجمع الاف المواطنين فالعيون. بوحدو واجه مواقف كثيرة للمينورسو. خدمتو فالعيون. تحركاتو كيخلع البوليساريو كثر من اي تحرك مغربي. من شيوخ تهديد الهوية ورئيس المجلس البلدي للعيون متحكم سياسيا فالصحرا. قوتو فالصحرا واخا دابا ولى متحكم فحزب الاستقلال. اختاريناه لخدمتو فالصحرا ماشي الحزب

7=

ياسين المنصوري
مدير “لادجيد” المخابرات الخارجية ياسين المنصوري مظلوم. كيخدم بزاف بزاف. غير شوف تحركاتو الاخيرة فالجمعية العامة للامم المتحدة مع ناصر بوريطة وزير الخارجية غادي يبان ليكم دورو. المغرب بان محيح فالهجرة وفمحاربة الارهاب فمنطقة الساحل وفالامن فالمنطقة. كلشي هاد الشي بفضل خدمة رجالاتو. مشكل اليوم مع وزير الخارجية فرقة مزيانة. مرة مرة كتكون شي كعيات ولكن فالعموم خدام مزيان

8=
التراب
مصطفى التراب الباطرون ديال “الفوسفاط” رجل من رجالات الدولة. حرك هاد المكتب مزيان. ولى استراتيجي بزاف بزاف للمغرب. مداخيلو تضاعفات بزاف. القطاع كتخدم بيه الدولة فديبلوماسيتها. كتخدم بيه فعلاقاتها الخارجية. التراب خاصو غير يقضي على حاجة مازال موسخة الفوسفاط وهي انه بلاصة لتوظيف العائلات لمرفحة. كل واحد زارع ولدو ولا شي حد من عائلتو فيه. اييه كيجيب كفاءات كبيرة حقاش غير بوحدو اللي يقدر يخلصها ولكن هادي غادية تبقى تابعاه.
التراب من المسؤولين اللي كيخلي مغاربة على برا يدخلو للبلاد. كيخلي الكفاءات لكبيرة تدخل

9=
فوزي لقجع

رئيس الجامعة الملكية لكرة القدم كيدير خدمة زوينة فالجامعة وفالكاف. معاه تأهلانا لكأس العالم بعد ما كنا ما كنتأهلوش حتى لكأس افريقيا. ولينا كنحلمو نربحو كأس افريقيا. رجعات الروح للمنتخب لكرة القدم المغربية. لقجع خدم فقطاع عامر انتهازيين عامر مستغلين. غادي وينقي فيه

10=

فوزي بنسعيدي
مخرج سينمائي قافز. افلامو ديما كتشكل حدث. اسلوبو طريقة اخراجو للافلام المواضيع المثيرة كتجعل منو مبدع حقيقي. وطني حقيقي كيحارب بطريقتو بعض الانتهازيين اللي كاينين فالسينما. الانتهازية راها ما خطات حتىو قطاع. ففليلم “وليلي” اللي معروض فالقاعات قدم موضوع الحب فقالب زوين. تفراج فيه كيفرحك