كود سبور//

قررت الإدارة ديال الرجاء الرياضي سلك المسطرة القانونية باش تحمي حقوقها فخدمات حمزة خابا اللاعب السابق ديال أولمبيك آسفي، لي تعاقد معاه النادي مؤخرا، ولي كيطالب فريق العربي الكويتي بدورو باش يحمل القميص ديالو إبتداء من العام الجاي كميبرر هادشي بامتلاكو البطاقة الدولية ديالو.

وكشفت مصادر جيدة الاطلاع على أن إدارة الرجاء  غتلجأ للجامعة الملكية المغربية لكرة القدم باش الأخيرة تراسل الإتحاد الدولي لكرة القدم “الفيفا” وتطعن فقرار منح البطاقة الدولية ديال اللاعب للعربي الكويتي، بداعي أن الاتفاق لي كان ما بين الفريق الكويتي وحمزة خابا كان مبدئي فقط وكينص على أن اللاعب خاصو يلتحق به نهار 1 فشهر  غشت باش يخضع للفحص الطبي، ومن بعد منها كيتم تفعيل العقد ما بين الطرفين، وهاذشي لي مكانش وبالتالي فالعقد كيتعتبر ملغي ما بينهم حسب هاذ البند لي ما تحترمش.

المصادر نفسها شارت إلى أن الاتحاد الكويتي لكرة القدم ولي كان همزة الوصل ما بين العربي الكويتي والاتحاد الدولي لكرة القدم “الفيفا”، فالحصول على البطاقة الدولية ديال حمزة خابا، كان عليه قبل ما يراسل “الفيفا” يتأكد واش العقد ما بين الفريق الكويتي واللاعب خابا مفعل أي كيأكد على أن اللاعب تجاوز الفحص الطبي بنجاح ولي كايكون حاسم فالتعاقدات أو لا فشل فيه، أو لا مخضعش ليه نهائيات ومن بعدها يراسل “الفيفا” باش يحصل على البطاقة الدولية ديال اللاعب، وطبعا هاذ الإجراء كيبقى مشكوك فيه واش دار أو لا ما دارش.

وبالمقابل وضحات مصادر أخرى على أن الاتحاد الدولي ديال كرة القدم، دائما كيعطي الأسبقية للاعب فمثل هاذ الحالات، وكيمنحو بطاقة دولية مؤقتة باش يلعب مع الفريق لي اختار وما يضيعوش، فانتظار يتحسم الملف، مشيرة إلى أن فريق الرجاء سبق وعاش تقريبا نفس الحالة مع المهاجم السابق بين مالانغو لي كان فيها الفريق واللاعب فنزاع مع مازيمبي الكونغولي، وحصل مالانغو على بطاقة دولية مؤقتة مكناتو باش يلعب مع الرجاء قبل ما يربح الفريق الأخضر القضية ويستمر المهاجم الكونغولي معاه، مع العلم أن اللاعب كيتعاقب عقوبات قاسية فحالة تمت الإدانة ديالو من وتأكد بلي كاين شي تزوير تزوير فالوثائق أو غيرها من الخروقات.

وكان حمزة خابا اتفق قبل أشهر مع فريق العربي الكويتي باش يلعب معاه إبتداء من الموسم لي جاي، ولكن من بعد منها تراجع اللاعب على القرار ديالو وخبر الفريق الكويتي بأنه ما غيقدرش يلعب معهم بسبب ظروف شخصية قاهرة منعاتو يحترف خارج المغرب، وهو الأمر لي متقبلوهش المسؤولين الكويتيين وبقاو متبثين باللاعب وقالو ليه يجي يلتحق بالفريق فمعسكر تدريبي فتونس بداية شهر غشت، وهو الأمر لي ما وقعش، قبل ما يعلن الرجاء الرياضي التوقيع الرسمي حمزة خابا من بعدما اجتاز الفحوصات الطبية بنجاح.