الوالي الزاز -كود- العيون ////

حدث خامر ما عندو حتى معنى ولا يقدم ولا يؤخر ترصدات له ميزانية بملايين الدراهم فالعيون. هادي هي العبارات لي يمكن يوصف بيها متابع للأحداث أشغال المؤتمر الخامس للجمعية الدولية للبحوث والتنمية في الإبليات، المنظم من طرف معهد الحسن الثاني للزراعة والبيطرة، بشراكة مع  وزارة الفلاحة والصيد البحري والتنمية القروية والمياه والغابات، ولاية جهة العيون الساقية الحمراء، وجهة العيون، ومؤسسة فوس بوكراع.

هاد المؤتمر ماعندو حتى معنى ولا فائدة لدرجة أنه همّش حتى المهنيين ديال الفلاحة ديال الصحرا ودارهم فآخر ندوة نهار الخميس؛ مؤتمر بغينا نسوقو ليه سياسيا وما قدرناش حيت أصلا ماعندو فائدة. 350 مشارك ما قدمو حتى موقف سياسي من نزاع الصحرا وتا واحد فيهوم ما دعم وحدة مملكتنا الترابية. جاو شي ناس وداروه فالعيون خداو الدعم بالمزيان ودوزو اربعة أيام ديال السياحة والماكلة والإقامة فابور ومشاو، لدرجة أنه حتى فمأدبات الغذاء والعشاء كتشوف ثلاثة ديال المدعويين فطابلة وحدة حالين فامهوم على البسطيلة وعتروس مشوي. الماكلة والشراب ما بغاهوم حد.

الأكثر من ذلك كاينة جهة دخلات على الخط وشاطت عليها لفلوس  وبدات كتفرق على صحافيين من بينهم شي وحدين من دول إفريقية وفق ما علمته “كود”. وزادت فوق هادشي بوعد بتقديم تعويضات أخرى لصحافيين وطنيين جايبينهوم يغطيو المؤتمر.

دابا هاد الصحرا عندكوم نتوما هي تجيو تديو لفلوس وتمشيو. هادشي راه عبث وتخربيق وما كتسماش تعويضات، بل كتسما تدويرة باش نزوقو الصورة لي اصلا اكثر من كارثية. واش ما كتحشموش على عرضكوم.

ومن جانب آخر ووفق ما علمته “كود” كاينين وحدين دخلو على الخط وبغاو نصيبهوم من الكعكة. وشي حد من المنظمين قاليهوم غادي نديرو معاكوم مبلغ رمزي.وراه شوهتونا يا الجياع.

هاد الناس لي كتفرق لفلوس وهاد الداعمين راه الأولى تديرو مشاريع فلبلاد وتدعمو الشباب بدل ما تبداو تفرقو فالمال العام ويصدق مال سايب أ تريكة ربعمية مكمشة.