وكالات //

بحال عدد من الفنانين العرب اللي سورفاو على الموجة، حتى الفنانة اللبنانية هيفاء وهبي، ناضت هنأت الممثل الميريكاني جوني ديب، بصفتها “صاحبتو” كيف كتقول، من بعدما ربح قضية التشهير ضد مراتو السابقة آمبر هيد.

ونشرات هيفاء وهبي، فيديو عبر خاصية ال”ستوري” على حسابها الرسمي بموقع “أنستكَرام” بانت فيه هي وجوني ديب (كانو تصورو مع بعضياتهم ف2017)، وكتبات على الفيديو: “تهانينا يا صديقي”. وزادت بارطاجات فيديو آخر كيبان فيه جوني ديب مع المحامين ديالو فرحانين وكيشطحو محتافلين بعد النطق بالحكم.

وفايت لهيفاء وهبي تلاقات مع النجم الميريكاني جوني ديب فحفلة عيد ميلادها عام 2017 فريسطو وسط العاصمة البريطانية لندن، وتصورات معاه.

هاد التنقاز ديال هيفاء نوض عليها شوية الصداع وانتاقدوها بسبابو بعض المتابعين، وخصوصا، حسبهم، وأن جوني ديب متهم باعتداءات جنسية وعنف منزلي فحق مراتو السابقة، وهادي ماشي شي تهم ساهلة، وأن الضحية مرا بحالها، وهي ماعارفاش التفاصيل أصلا، وناضت كتنقز وتعاطفات مع الممثل الميريكاني، حيت غير واحد النهار تصورات معاه بالصدفة وبغات تبع الموجة وتدير البوز شوية، علما أن المحاكمة مزال غادي تتواصل من بعد قرار آمبر هيرد برغبتها فاستئناف الحكم ويقدر كلشي يتقلب، حسب ما جاء فبعض التعليقات ديال المنتقدين لموقف هيفاء وهبي.