اجرى الحوار علي الصافي ////

قال اگناسيو سمبريرو صحافي “الكونفيدونسيال” المتخصص فالعلاقات المغربية الاسبانية فحوار مع “كود” ان الازمة بين الدولتين غادية تطوال. فالحوار رجع لقضية غالي ولاسباب هاد الازمة ولعدم تغطية القنوات الاسبانية لهاد الحدث.

“كود”: السؤال الاول:
 باعتباركم خبير فالعلاقات المغربية الاسبانية٬ كيفاش غادية تسالي هاد الازمة بين الرباط ومديد؟
سمبريرو: كنظن باللي هاد الازمة ماشي انية ولكن غادية تكون مدتها طويلة٬ راه فنهاية يونيو او يوليوز حكم قرار المحكمة الاوربية بخصوص اتفاقيات الصيد البحري بين المغرب واوربا والشراكة. كنظن هاد القرار ديال المحكمة الاوربية ما غاديش يكون فصالح المغرب وهاد الشي غادي يخلي هاد الازمة تزيد تطوال.
للتذكير هاد الازمة ما بداتش من استقبال الصبليون لابراهيم غالي نهار 18 ابريل 2021 ولكن قبل. راه ف10 دجنبر وبقرار من الرباط تم تأجيل اجتماع اللجنة العليا المشتركة المغربية الاسبانية. دابا دازت 6 اشهر وما كاين حتى شي تاريخ لهاد الاجتماع. لاحظت ان المغرب اجل هاد اللقاء فنفس النهار اللي دونالد ترامب رئيس اميركا حينها٬ علن قرار امريكا بالاعتراف بسيادة المغرب على الصحراء الغربية 

“كود”: السؤال الثاني من بين اسباب هاد الازمة ان لم يكن السبب الاهم هو قضية الصحراء: هل يمكن للرباط ان تحصل على موقف اسباني بحال الموقف الاميريكي من قضية الصحراء: الاعتراف بمغربية الصحراء او الحكم الذاتي تحت السيادة المغربية؟ 
سمبريرو: كنظن ان موقف الاسباني ما غاديش يتغير بخصوص قضية الصحراء. مدريد كتدعم المغرب وفملفات كثيرة. مثلا فالمحكمة الاوربية المحامون الاسبان كيخدمو بتنسيق مع المحامين اللي كيجيبوهم الجمعيات المغربية كما ان هاد العمل على دعم الرباط كيكون كذلك فلجنة اصدقاء الصحراء الغربية =كتضم 5 بلدان= فنيويورك. لكن هاد المواقف كدار من التحت. 
فقضية الصحرا٬ اسبانيا ماشي هي اميركا دونالد ترامب ولا هي على موقف فرنسا اللي الدولة الوحيدة الداعمة بشكل علني مشروع الحكم الذاتي اللي قدمو المغرب 2007. اسبانيا لا تدعمه بشكل علني لكن التحت وبعيد على الكاميرا٬ مدريد تعتابر هاد المشروع “حاجة زوينة”.اللي كتقلب عليه السلطات المغربية هو ان الصبليون تخرج للعلن بموقفها اللي كتتاخدو بالتخبية

“كود”: السؤال الثالث كشفتي فمقال نشرتيه ف”الكونفيدانسيال” باللي المخابرات الاسبانية ما كانش عارفة بقضية ابراهيم غالي اللي دخل لاسبانيا بجواز سفر ديبلوماسي جزائري وهوية مزورة فالمقابل قللتي من امكانية يكون هاد لخبار جاي من مخبر جزائري خدام مع المغرب. واش كنظن ان هاد لخبار جاية من اسبانيا؟
سمبريرو: ابراهيم غالي زعيم البوليساريو دخل للصبليون نهار 18 ابريل 2021 بجواز سفر ديبلوماسي جزائري ولكن باش وصل لصبيطار لوكرونيو فشمال اسبانيا٬ تسجل بهوية مزورة. ما مقتانعش باللي هاد لخبار جات للمغرب من عميل ديالها فالجزائر٬ كنظن ان هاد لخبار جابتها المخابرات المغربية من مصدر مقيم فالصبليون. طبعا ما يمكن لي نجزم. هاد السر غادي يبقى لمدة طويلة محفوظ. 

“كود”: السؤال الرابع علاش غابت هاد الازمة بين الرباط ومدريد على النقاش العموم فالاعلام الاسباني خاصة القنوات التلفزيونية
سمبريرو: الازمة المغربية الاسبانية كانت غايبة على الاعلام الاسباني خاصة قنواتو لسبب بسيط هو ان البلد يعيش احداث داخلية كثيرة ومكثفة. كانت مثلا مؤخرا الانتخابات الجهوية فمدريد. لذا فالاعلام الاسباني بقى مركز على مواضيع كتهم المعيش اليومي للاسبان بحال الازمة الصحية وتبعاتها الاقتصادية والازمة اللي ديما كاينة بين مكونات الاغلبية الحكومية والمعارضة السياسية. اظن انو لهاد الاسباب تم تجاهل الازمة الحالية بين الرباط ومدريد فالاعلام الاسباني

كود: السؤال الخامس فهاد الازمة كانت مراسلات من احزاب سياسية مغربية لاحزاب اسبانية ثم كان اتصال بين اخنوش رئيس التجمع الوطني للاحرار وكاسادو تبعو اخر بين نفس السياسي الاسباني وزعيم حزب الاستقلال
سمبريرو: كنظن باللي بابلو كاسادو =زعيم الحزب الشعبي اليميني الاسباني المعارض= كيقلب علي يدير بلاصتو فالمغرب. يعتقد انو طال الزمن او قصر٬ غادي يوصل لمونكلوا ويسير الحكومة٬ لذا كيقلب علي يربط الصلة بمسؤولين سياسيين مغاربة هاد الشي علاش كان عندو اتصال مع كل من عزيز اخنوش زعيم التجمع الوطني للاحرار ونزار البركة زعيم حزب الاستقلال. اظن ان جزء من الصحافة المغربية المقربة من السلطة استغلت هاد الاتصالات. هدرات على ان كاسادو عبر على اتفاقو مع الزعيمين المغربيين ضد رئيس الحكومة اليساري بيدرو سانشيز. لا اعتقد ان هاد الشي وقع. ما يمكنش لزعيم حزب المعارضة يثير مواضيع داخلية مع مسؤولين حزبيين مغاربة او غيرهم