الرئيسية > آراء > سلسلة ربعمية مكمشة،الحلقة12:ولكن كيفما الحياة تقدر تكون مملة تقدر تجيب معاها شي حد يقلب ليك حياتك اكثر ماكانت مقلوبة
12/07/2017 10:05 آراء

سلسلة ربعمية مكمشة،الحلقة12:ولكن كيفما الحياة تقدر تكون مملة تقدر تجيب معاها شي حد يقلب ليك حياتك اكثر ماكانت مقلوبة

سلسلة ربعمية مكمشة،الحلقة12:ولكن كيفما الحياة تقدر تكون مملة تقدر تجيب معاها شي حد يقلب ليك حياتك اكثر ماكانت مقلوبة

نبيلة شرف_كود

طلقني المصطفى من بعد داكشي لي وقع، داكشي لي بغى مني خداه ورجع لعائلتو وبهايمو ومراتو وولادو. داك الظرافة والكرم كلو كان على ود بكارة،  قاليهم انه لقاني ماشي بنت وان الناس قالو ليه انني كانفسد مع بزاف ديال الرجال فالمدينة. لي كان سبي مقنع قدام الناس انه يطلقني، ماخديت منو والو من غير واحد الرعب لي عمري ماغادي نساه. كلشي تيقو ومنين سولاتني خالتي نجية شنو واقع بقيت ساكتة ماقدرتش ندافع على راسي، ماعرفتش انه كان بإمكاني نثبت البراءة ديالي عند الطبيب حيث كان غادي يلقى البكرة عاد افتضت .ولات السمعة ديالي كي الزفت، كلشي كايشوف فيا نص شوفة، نجية كاتجاوبني غير بالسيف حيث عند بالها حشمتها مع الناس ومع المصطفى لي فنظرها ولد الناس وراجل غزال مايتعابش وَلَكِن داكشي لي وقع عارفاه غير أنا بوحدي ومانقدر نعاودو لتاواحد. كنت بغيت نوريها البقعة ديال الدم لي كانت فوق ليزار ديال الناموسية.

واحد النهار قالت لي انه الحمد لله لي مّي ماتت قبل ماتشوف عليا هادشي.

كنّا عايشين فالتسعينات، الحركة عيانة والاقتصاد مهلوك من بعد الإضرابات لي عرفاتها فاس حيث التجار الكبار خافو وهربو لكازا والرباط وطنجة. سدو المعامل ديال التيكستيل لي كانو كايطلبو البنات فالسن ديالي باش يخدمو.

بعت الدمليج ديال الدهب لي جابلي المصطفى. كانت الحاجة الوحيدة لي عندها قيمة داك الساعة، ولي دفعت ثمنها بكرتي لي عاطياني قيمة فعينين الناس. نقص ثمنو بزاف، ماعرفتش واش الدهايبي ضحك عليا أنا وخالتي نجية حيث شافها هي عمياء وانا ماكانعرف حتى نهضر ولكن الدمليج نقص خمسة مرات ثمنو.

رجعنا لنقطة البداية، ماكاينش لي يصرف، الفرق هو انني وليت فتاة عندها صطاشر عام مطلقة وتاواحد ماكايتيق فيا، حتى من سميرة دارت براسها ماكاتعرفنيش حيث المدينة صغيرة و كلشي كايعرف كلشي على كلشي.

كنت غادي نحماق بقلة النعاس، فين ماكانسد عيني كانتخيلو كايدير لي نفس داكشي لي دار. كنت كانبقى فايقة باش نحاول نهرب من الأحلام ونعيش شي ذكرى بسيطة عشتها مع ماما ولا سميرة ولا هشام واخا الذكريات قليلة بزاف ولكن والو، كانبقى فالدوامة ديال التفكير. دازت الأيام، الفلوس سالات، نجية زادت مرضات، أنا مرضت بقلة النعاس. ولكن كيفما الحياة تقدر تكون مملة تقدر تجيب معاها شخص يقلب ليك حياتك اكثر ماكانت مقلوبة. هنا غادي نتعرف فالحمام د الزنقة على حنان لي ماعرفتش واش نشكرها على وجودها فحياتي ولا  نلعنها.

موضوعات أخرى

29/03/2024 11:00

الدريب لـ گود: الناصيري عطى لكثير للوداد وهادي صفحة وطويناها ودابا حقبة جديدة برئاسة البرناكي وغنخدمو لإرضاء الوداديين

29/03/2024 10:40

جدل امتحان البيرمي.. “نارسا”: كاين تطور إيجابي فنسبة نجاح المترشحين فاليوم الرابع ووصلات لـ54,41 فالمية

29/03/2024 10:30

بلقشور: الوداد تحملو مسؤوليتهم والجموع العامة دازت مزيان وتم التصويت على گاع التقارير ومبروك عليهم

29/03/2024 10:21

تقرير رسمي: أسعار الصناعات الغذائية فبلادنا تراجعات وإنتاج وتوزيع الما والضو مستقر

29/03/2024 10:00

دقة تابعا دقة فـ”قضية تمويل فرحان” مول الشروق. بوصوف كان غادي يدير درس حسني قدام سيدنا ويقدم كتابو ليه وحيدوه

29/03/2024 09:50

ماتش الكوكب والحسنية.. تابعوه 20 ألف واحد وولاية أمن لمدينة لحمرا سخرات 1270 بوليسي وها شحال تشدو

29/03/2024 09:42

السينمائيون يهاجمون بنسعيد: كاين تراجع فالمكتسبات للي تحققات فحكومات سابقة وخاص حوار جاد ومسؤول باش نتجاوزو الأزمة