كود هناء ابو علي كازا ///

علمت “كود” باللي بدات الاجراءات الفعلية هاد السيمانا باش يوجدو عودة لمغاربة اللي حصلو برا بسباب “كورونا فيروس”. مصدر “كود” قال باللي بدات المراسلات فهاد الشي بين المؤسسات المختصة: الداخلية والخارجية والصحة والنقل الجوي.

مصدر “كود” قال باللي بدا تجهيز بنيات استقبال هاد الناس. هاد البينات وفق مصدر اخر ل”كود” واجدة من بدية الجايحة وما خدماتش. ما حتاجاتهاش الدولة كلها. كاينين معاهد واحياء جامعية ومراكز الشباب وشي اوطيلات.

هاد السيمانا غاديين يحسمو وفق مصدر “كود” ف”حصر سيمات اللي غاديين يجيو وعمرهم وحالتهم الصحية، اي واش عندهم سوابق صحية. طبعا كاينة حاجة اخرى هي كي دايرة القضية فالبلاد اللي فيها. واش كورونا فيروس محيحة ولا اللا.

توقع مصدر “كود” باللي هادو اللي غاديين يدخلو كلهم غاديين يديرو ليهم “الزامية الحجر” اي عندهم 14 يوم فهاد البلايص دالاستقبال

طبعا ماشي كلشي غاديين يدخلو السيمانا الجاية. غادية تكون دفعات. سبتة ومليلية ومن بعد اسبانيا غادية تكون هي اللولى لانها قريبة وممكن فحالات ما تحتاجش حتى للطيارة. ممكن نقل مغاربة فباطو لطنجة اما سبتة ومليلية غير كار يجيبهم.

وفق مصادر متطابقة ل”كود” فعدد المعنيين لحد الان بهاد الشي فايت 45 الف مغربي وغادي يطلع بزاف ايلى قررو الطلبة اللي كيقراو فاوربا يدخلو. غير هادو على حساب واش غاديين يديرو امتحانات واش باقية عندهم لقراية فالدول اللي فيها ولا كلشي غادي يتأجل.

غير هاد الشي غادي يتقام على المغرب غالي ايلى كانت الدولة مكلفة بيه. ميريكان ما تكلفاتش بيه. علاش خاص هاد الشي يكون على حساب الدولة. خاص الرحلة تكون على حساب المواطن. واحد سافر وخرج من حقو يرجع. هو اصلا عندو تذكرة ذهاب واياب. ايلى مع لارام مزيان ولكن ايلى كان مع شركة طيران اخرى خاصو يخلص من جيبو. ثم هاد القضية ديال الزامية الحجر 14 يوم ما عندها معنى دابا.

كاين تيست سريع دابا. اللي دخل وبغاه يخلصو ولا يتافقو مع دول فيها هادو بحال فرانسا او اسبانيا ويديروه قبل ما يجيو للمغرب. بحال هاد الشي غادي ينقص مصاريف كثيرة بزاف للدولة. هي دابا كتخسر فلوس من خلال اوطيلات وماكلة. ممكن جدا يديرو التيست قبل ما يجيو.

من بعد يمشيو يديرو حجر فديورهم. دابا اصلا المغرب كولو حجر صحي.

المغرب خسر بزاف فهاد القضية. خاص يتحاسب اللي كان سبابها. اللي رفض يدخل لمغاربة لبلادهم. حتى ولينا ضحكة. كان العالم كيهدر علينا بصناعة الماسكات ووو ودابا بدولة رافضة مواطنيها. باسبور مغربي ما صالحش يدخل للمغرب. خاص اللي دخلو يدعيو الدولة المغربية. راها شوهة عالمية. احتجاجات ورسائل لرئيس الدولة ومصايب كحلى وصافي. وزاد تصريح بنعرفة الغبي فالقنوات العمومية شعل الناس باش قال حتى تفتح الحدود عاد يرجعو. واش محتاجينك بعد ما تفتح الحدود؟ تعطلنا بزاف بلا فايدة